Tankinan ku tabatin logo di PDVSA ariba na Pòst 6, por bira interesante atrobe na Kòrsou.

Isla—PDVSA a firma dos kontrakt pa entrega di produkto kontra di pago kèsh, kual por ta interesante pa Kòrsou. E agensia di notisia Reuters a anunsiá 25 di òktober último, ku dos kompania prosedente di Dubai, Emiratonan Arabe,  a firma ku PDVSA pa entrega di krudo, gas i derivadonan petrolero.

Entretantu, Refineria di Kòrsou tambe a firma MOU ku un kompania di Medio Oriente na Qatar, Orxyx Petroleum. Ta trata di un kompania ku interes grandi na Qatar sostené pa e fondo nashonal di invershon Qatari. E desaroyonan di interes for di Medio Oriente den Venezuela, por ta otro bon notisia pa Bullenbaai i Curaçao Refinery Utilities. E terminal di tanki na Bullenbaai ta pasando den mal tempu, despues di konfliktonan sivil rondó di derechinan entre e kompanianan ligá ku Caribbean Petroleum Refinery. Bullenbaai for di Febrüari 2023 no ta risibiendo pago. Entretantu CRU a kibra e kontrakt ku CPR, den lokual a kondusí na mas ku 7 kaso sivil den korte pa claim propiedat di 490 mil bari di fuel oil den tankinan na Bullenbaai. Mañan pa kasualidat tin un di 8 kaso tumando lugá.

E akuerdo di PDVSA ta duna e kompanianan Emirato derechinan kasi eksklusivo pa kuminsá eksportá produktonan petrolero i gas for di Venezuela ku destinashon pa Medio Oriente. Resientemente, un kompania internashonal di Medio oriente Oryx Petroleum (di Qatar) a atkerí servisionan di eks direktor na Aqualectra Darick Jonis, via di un otro kompania Alternative Energy Facility B.V. (AEF). E kompania ku a firma un MOU pa maneho di Refineria Isla, ta dependé riba rekomendashonnan di e.o. Darick Jonis pa nan por tuma un desishon final. Jonis ta ligá ku e kompania AEF, Alternative Energy Facility, kende tambe tin un kontrakt ku Oryx.

E notisia di Oryx te ainda ta e mihó notisia ku por a drenta despues di 4 frakaso pa logra yega na un sosio stratégiko pa maneho di e refineria estatal. Den pasado, negosiashonnan a bai robes ku e grupo di Count Energy, Klesch, CORC i últimamente ku Caribbean Petroleum Refinery. Ku Oryx, e senario ta mustra otro i atkishon di eksperto lokal Darick Jonis, kosnan ta mustra di ta bai den un bon direkshon. Oryx, kual kompania Refineria di Kòrsou a konfirmá di firma un MOU ta un kompania ligá ku e organisashon potente di Qatar Investment Authority, kual organisashon ta manehá e Fondo di Invershon Soberano di Qatar. Manera Vigilante a publiká, Oryx tin interes den Isla i Bullenbaai. Esei ta lokual fuentenan verídiko a informá redakshon di Vigilante.

Pa e trabounan tékniko, Oryx a sera un otro akuerdo ku Maunsell Management pa manehá e partinan tékniko, finansiero i struktura legal den kuadro di ekisgenshanan riba Deligensha Responsabel relashoná ku e akuerdo di Refineria di Kòrsou. Ta e intenshon pa e konseheronan den korto tempu traha un rapòrt i presentá nan konklushonnan i rekomendashonnan. Asina Jonis i demas konsultorio finalisá nan rapòrt, Oryx ta inisiá e negosiashonnan pa finalisá un akuerdo ku Refineria di Kòrsou.

Segun Reuters Estádos Unídos a kuminsá fleksibilisa nan restrikshonnan petrolero kontra di PDVSA. PDVSA a sera e dos akuerdonan menshoná riba un akuerdo di pago kèsh. E lisensianan ta otorgá pa un durashon di 6 luna. Mas aleu, Reuters a menshoná tambe ku PDVSA mesora a kuminsá aserka nan klientenan di 2019 pa kuminsá entrega produkto. E kompania ta den nesesidat urgente di likides unda e fasilidatnan di almasen na Kòrsou ta bira aktivonan importante pa hür. Segun e dokumentonan, PDVSA a hasta eksihí prepago di tur entrega ku nan mester hasi na e kompanianan Emirato. PDVSA ta biniendo bèk for di entreganan ilegal ku a kosta e kompania mas ku 500 mion dòler estado unidense, inkluso un entrega kontrabanda di fuel oil na Kòrsou, den tankinan na Bullenbaai. PDVSA a firma un kontrakt pre-pago ku un kompania den Medio Oriente pa entrega di riba 1 mion bari di fuel oil na e kompania Asia Charm Ltd. E akuerdo tabata pa 41 dòler pa bari.