Aktualmente tin turtuganan ku a kome e piska venenoso “pufferfish” i ku tin sierto turtuganan malu.

Willemstad, — Ard Vreudenhill di Sea Turtle Conservation Curaçao ta splika ku e turtuganan ta tene awa limpi pero ku nan a kome un piska venenoso kual ta pone nan bida nan peliger.

Ard Vreudenhill di Sea Turtle Conservation Curaçao, ta splika ku turtuganan ku ta landa den laman ta mané e Selikor di laman. Lamentablemente e turtuganan a kome e piska ‘pufferfish’. Esaki ta e temporada pa e piskánan venenoso aki produsí. Pues e turtuganan ta kome limpia laman pero esakinan a kome hopi di e piskánan venenoso aki. Pufferfish tin e kapasidat pa mata diferente bestia di laman ku ta kome esaki.  E venenu por sali for di e turtuga pero pa hasi esaki mester neutralisá e turtuganan ku karbon aktivo i e veterinaria di e Sea Turtle Conservation Curaçao ta yuda ku esaki, Ard Vreugdenhill ta splika.

Ora e turtuganan envenená landa bou di awa nan ta mustra mané mariá i pues esaki ta splika dikon nan ta landa straño. Nan tin problema pa hala rosea bou di awa, i p’esei mester kue nan paso si no nan ta muri, Ard Vreugdenhil ta splika. Nos a haña par di reporte di turtuganan malu i na Boneiru tin tambe un par di turtuganan malu. No ta tur hende tin pèrmit pa kue turtuga for di awa i ta bon pa yama Sea Turtle Conservation Curaçao via number  +5999 664 7970 pa asina e organisashon bini i yuda kue esakinan.

Piskadónan por kue e turtuganan lora nan den paña i pone esakinan den sombra i Sea Turtle Conservation Curacao lo pasa pa asina kaba di yuda, sr Vreugdenhill ta splika. Ard Vreudenhill ta bisa ku Sea Turtle Conservation Curaçao tin hopi kontakto ku e sambuyadónan na Kòrsou i nan ta e orea i wowo di e organisashon i pues tin hopi hende alèrt pues pa lokual ta pasa den laman.