Back to Top
Responsive image
E korant di pueblo

Mi frei tabatin mi bou di preshon p’esei mi a stür pa kometé 31 atrako"


May 20, 2021 • 3 minüt pa lesa

Despues ku e dama Sabina Walle a koperá ku hustisia i tambe a atmití ku nan a
kometé tur e 31 atrako nan Fiskal ta hasi un demanda di 14 aña pe.

Willemstad— Despues ku e dama Sabina Walle a koperá ku hustisia i a mustra unda e i Chamir Cepeda tabata bai benta e kaha di plaka nan despues di kada atrako i tambe a atmití ku nan a kometé tur e 31 atrako nan Fiskal ta hasi un demanda di 14 aña pe.

Ta asina ku ya den pasado e dama a indiká ku e nunka no a kometé niun di e atrako nan, e solamente tabata e shofùr di e Vitz shinishi ku nan tabata bai kometé e atrakonan aden.  Segun e dama ku e la hañ’é bou di preshon di Chamir Cepeda alias ‘hòmber sombrero’ di tabata shofùr di e outo durante tur e atrako nan. E dama a splika ku nunka e no por a bisa niun hende nada paso semper Chamir tabata kana bai tur kaminda su tras, i ku tambe Chamir a kibra su telefon ya asina e no por tin kontakto ku niun hende. E la splika ku si e bisa ku e ke bai serka su mayor, Chamir ta bisé ku e tambe ta bai su tras pues ku no tabata tin niun kaminda ku e por a bai su so paso semper Chamir ta bisa e ta bai. Despues di kada atrako nan ta bai i benta e kaha di plaka nan i Chamir ta konta e sèn i dun’é loke e ta haña ta bon nunka nan ta konte huntu òf partié pa parti igual paso Chamir so tabata konta i parti e sèn.

E dama a indiká ku rònt di su kurpa e tin marka nan blou di sala ku e la risibí na man di Chamir i p’esei semper e tabata tema pa su bida pa Chamir no hasié nada. E dama a splika ku na kada un di e atrako nan ku nan bai ora ku Chamir baha for di outo e ta sera su wowo i baha kabes paso no ta algu ku e ke hasi pero e ta hañ’é ta hasié sino Chamir ta dal e. Wes a indiká na e dama segun kalkulashon ya nan tin 1 aña i mei bezig ku e atrako nan aki i nan a laga hopi daño atras i hopi spantu den kada víktima kiko e ta haña di esaki . E dama a bisa wes ku e ta lamentá hopi paso no ta algu ku e tabata ke i ku e tabatin su trabou pero pa falta di Chamir e la bin pèrdè esaki.  E dama a lanta i a pidi kada un di e víktima nan ku tabata den sala diskulpa paso e ta lamentá loke ku a pasa.

E la splika ku ta duel e hopi mirando ku e ta un mama ku mester kuida di su yu di 3 aña ku ta kedando na e wela, i awor e ta enkarselá i no sa te ki dia e lo sali pa por mira su yu. E dama a splika tambe ku e la mira ku Chamir ta ninga di a kometé e sobra atrako nan i ku esaki no ta kuadra paso si no tabata ku Chamir e la kometé tur e 31 atrako nan ke ta e otro hòmber sombrero e ora ei. Wes a bisa e dama ku e ta haña hopi jammer mirando ku e dama ta basta hóben ainda i tin un yu chikí di 3 aña ku mester wak riba dje. Fiskal a bisa e akusado ku e la duna un deklarashon di ku ora ku Chamir baha for di outo pe kometé atrako e ta haña miedu i miedu di kiko asina e tabata haña. E dama a indiká ku e tabatin miedu di su mes bida i di ku algu lo por pas’é. Fiskal a bisé ku e ta haña miedu di su mes bida i no bida di e otro persona nan ku nan ta atraká. Fiskal a hasi un demanda di 14 aña pa e akusado.

Login