WILLEMSTAD – Minister di Finansa Javier Silvania entretantu a manda tantu e Rapòrt di Ehekushon tokante e promé trimèster di e aña akí, komo e Rapòrt di Maneho Finansiero pa e kolegio di supervishon finansiero CFT.

E Minister a splika siman pasá ku pa falta di kapasidat i muchu trabou, Ministerio di Finansa no a logra kumpli ku e periodo den kua mester entregá e Rapòrt di Ehekushon tokante maneho finansiero. El a informá tantu Parlamento pa medio di Presidente Charetti America-Francisca komo Cft pa medio di Presidente Lidewijde Ongering por eskrito di lo manda e rapòrt fin di luna. Entretantu el a mand’é.

Konforme e lei di Reino di supervishon finansiero ‘Rijkswet financieel toezicht Curaçao en Sint Maarten’ (Rft) i tambe e ordenansa di kompatibilidat ‘Landsverordening Compatbiliteit 2010’, mester manda un informe di implementashon tantu pa e kolegio komo Parlamento pa mas tardá seis siman despues di final di kada trimèster. Sinembargo Silvania mester a informá ku lo no tabata posibel kumpli ku e plaso. E splikashon duná siman pasá: “E departamentu di presupuesto di Ministerio di Finansa aktualmente no tin sufisiente personal, debí na e kantidat di personanan ku boluntariamente a bai ku penshon antisipá, hasiendo uso di e asina yamá ‘Vrijwillige Vervroegd Uitdiensttreding’ (VVU).”

Segun e Minister, su Ministerio tabata obligá e último dianan na atendé e maneho di kuentanan anual di aña 2021 (trabou di ouditoria SOAB), seramentu di buki di 2022, i preparashon dje presupuesto 2024. El a primintí di manda e rapòrt pa mas tardá 29 di mei próksimo i a kumpli entretantu.