Minister di Desaroyo Sosial, Trabou i Bienestar (SOAW), Ruthmilda Larmonie-Cecilia.

WILLEMSTAD – Parlamentario David Seferina di frakshon di MFK na mart último a manda un karta ku 8 pregunta pa Minister di Desaroyo Sosial, Trabou i Bienestar (SOAW), Ruthmilda Larmonie-Cecilia tokante e situashon finansiero di Fundashon Kas di Anciano ‘Nos Welita’.

Na promé lugá e tabata ke sa si e Minister ta na altura di loke ta pasando ku e instituto di kuido. Larmonie-Cecilia ta indiká den su karta di kontesta ku Parlamento a risibí djabièrnè último, di ta na altura di loke a pasa ku e instituto. “Dia 18 di febrüari último, ministerio di SOAW a risibí un karta di parti di Fundashon Kas di Anciano ‘Nos Welita’, den kua e instituto ta informá ku a hasi un anulashon di nan supsidio sin previo aviso. Su manisé, 19 di febrüari 2024, ministerio di SOAW a reakshoná riba e karta akí ku un karta, informando e fundashon ku no ta trata di un anulashon.”

Konforme e lei ku a usa pa otorgá supsidio pa 2024, esta e asina yamá “Landsbesluit subsidie 2016”, e periodo pa un supsidio riba petishon ta pa un aktividat di máksimo 12 luna. Asina artíkulo 21 insiso 1 dje dekreto ta stipulá. E Minister: “Esaki ta nifiká ku anualmente mester hasi un petishon pa supsidio. Segun e atministrashon di ministerio di SOAW, to ku e fecha di 19 di febrüari 2024, Fundashon Kas di Anciano ‘Nos Welita’ no a hasi ningun petishon. Esaki ta nifiká ku nos no por papia di un anulashon di supsidio, mirando ku e supsidio pa 2023 a terminá, konforme lei, na desèmber 2023.”

E Minister ta añadí na di dos lugá, ku segun artíkulo 19 insiso 1 dje dekreto, mester entregá un petishon minimal 14 siman promé ku e aktividat tuma lugá. Esaki ta nifiká ku sí e supsidio mester kuminsá konta pa 1 yanüari 2024, mester a hasi e petishon promé ku dia 25 di sèptèmber 2023. Tur fecha despues di esaki, konforme artíkulo 24 insiso 1 paraf b, ta hasi e petishon outomátikamente no-atmisibel, pa motibu ku no a entregá e petishon konforme e periodo stipulá pa lei.”

No opstante esaki, dia 24 di òktober 2023, representantenan di Ministerio di SOAW a hasi un bishita na e fundashon, kaminda a informá tesorero dje fundashon Erwin Asjes, ku no a risibí e petishon pa ku supsidio 2024 i ku esaki ta lat segun e lei menshoná. Apesar di esaki a hasi un petishon na su persona pa hasi su máksimo esfuerso pa por entregá e petishon mas pronto posibel i ku nos lo wak kiko por hasi mirando ku ya kaba e petishon ta kontra di lei. Segun e Minister, Asjes a yama danki pa e oportunidat i a palabrá ku lo a hasi esaki. Te ku dia 29 di yanüari 2024, e Ministerio no a risibí ningun petishon di parti di Fundashon Kas di Anciano ‘Nos Welita’ i a tuma e inisiativa pa bolbe yama e fundashon pa informá ku ainda no a risibí nada serka e fundashon.

Konforme e lei ariba menshoná, asta sí e fundashon a entregá e petishon dia 29 di yanüari ei mes, e periodo ku e fundashon por pidi un supsidio p’e konforme lei lo ta di 6 di mei te ku 31 di desèmber dje aña akí. “No opstante esaki, un representante di e ministerio a pidi sr. Asjes pa entregá e petishon tòg pa nos por deliberá di ki manera por yuda e fundashon ku na vários okashon kaba a neglishá e leinan di supsidio. Finalmente, dia 27 di febrüari último, e Ministerio a risibí e petishon di e fundashon.”

Oument
Seferina tabata ke sa ademas si ta bèrdat ku diferente biaha ‘Nos Welita’ a pidi pa oumentá e supsidio akí, pero ku a rechasá e petishon akí. Minister Larmonie-Cecilia di PNP: “Segun e atministrashon di ministerio di SOAW, e fundashon no a hasi entrega di niun karta ofisial hasiendo e petishon pa oumentá e supsidio, te pa nos por papia di un rechaso di parti di e ministerio. Loke sí por bisa ta, ku dia 24 di òktober 2023, e fundashon a indiká durante di e bishita, ku e supsidio no ta yega. Na ningun momentu e fundashon no a aserká e ministerio di forma ofisial ku pruebanan pretu riba blanku pa supstansiá esaki.”

Espasio
E Parlamentario di MFK a puntra tambe si ta bèrdat ku gerensia di ‘Nos Welita’ a pidi un espasio pa por entregá un petishon pa supsidio ku sifranan real, pero ku a rechasá esaki. Segun e Minister, riba e fecha di bishita na e fundashon, e fundashon a informá representantenan di e ministerio ku e petishon ta retrasá komo ku no a keda kla ku e dokumentonan ku e lei ta preskribí. “A indiká na e fundashon pa kuminsá hasi e petishon tòg i ku lo tene esaki den konsiderashon. Dia 29 di yanüari 2024, e fundashon a duna e mesun motibu pa e retraso di e petishon i a informá ku lo tin tur kos kla pa dia 15 febrüari 2024, pero te ku e fecha ei, ainda e ministerio no a risibí niun petishon. Pues pa kontestá e pregunta konkreto, no ta bèrdat ku gerensia di ‘Nos Welita’ a pidi un espasio pa por entregá un petishon pa supsidio ku sifranan real i outomátikamente tampoko no por ta bèrdat ku a rechasá esaki.