WILLEMSTAD – Minister di Desaroyo Sosial, Trabou i Bienestar (SOAW), Ruthmilda Larmonie-Cecilia a splika riba pregunta di Parlamentario David Seferina ku e personal di Fundashon Kas di Anciano ‘Nos Welita’ a kobra salario di yanüari sigur. Di tur manera e Ministerio di SOAW tin atenshon pa e situashon finansiero dje trahadónan.

Seferina a manda su karta ku pregunta dia 4 di mart último p’e Minister riba e tópiko di salario di trahadónan i kontinuashon di kuido pa klientenan di ‘Nos Welita’. El a puntra e Minister sí e ta na altura ku ta pa problema finansiero hopi trahadó no a risibí nan pago for di yanüari.

Minister Larmonie-Cecilia a sita den su karta e kontesta dje fundashon riba esaki: “Den e karta ku e ministerio di SOAW a risibí dia 18 di febrüari último, e fundashon a informá ku ‘Afortunadamente direktiva a logra di kumpli ku su debernan finansiero pa fin di yanüari for di su reservanan, sinembargo sí pa fin di febrüari 2024, direktiva no haña supsidio, Fundashon Kas di Anciano Nos Welita lo no por paga salario, ni impuesto, ni kumpli ku su distribuidornan. I mas pió lo no por alimentá e abitantenan ku SOAW mes a pone den Kas Nos Welita durante hopi aña’.”

Pues Minister no tabata na altura ku e trahadónan no a risibí nan pago for di yanüari. Asina el a enfatisá den e karta. “Dia 5 di mart 2024, un delegashon di e ministerio di SOAW ku a bai hasi bishita na e instituto a puntra un trahadó sí el a risibí su salario di yanüari 2024 i esaki a kontestá ku nan a risibí salario dia 29 di yanüari.”

Riba e pregunta si e lo bai duna e kaso akí atenshon pa e trahadónan risibí nan salario, e Minister a sigurá ku e kaso akí tin su atenshon. “Ta importante pa menshoná sí ku un petishon tin ku kana un proseso konforme artíkulo 19 insiso 2 dje Landsbesluit subsidie 2016, kaminda ta dura mínimo 6 siman, despues ku tur dokumento ta na òrdu, pa e fundashon risibí un desishon riba su petishon. Sinembargo, mirando e gravedat di e kaso akí, ya kaba representantenan di e ministerio ta trahando dia i anochi pa por tin un desishon mas pronto posibel riba e
petishon. Sinembargo dia 19 di mart e ministerio di SOAW a hasi un transakshon pa e instituto pa asina nan por paga entre otro salario.”

Seferina tabata ke sa tambe si Minister Larmonie-Cecilia ta na altura ku sí no tuma pasonan nesesario e pashèntnan lo bai keda sin alimento e siman ku ta bini akí (refiriendo na e di dos siman di mart, red.). E minister ta indiká di ta na altura di esaki i a ripití ku representantenan di su ministerio ta trahando dia i anochi pa por tin un desishon mas pronto posibel riba e petishon. “Entretantu for di dia 6 di mart 2024 te ku dia 19 di mart 2024, Ministerio di SOAW a sòru pa e instansia haña alimento esta un pan, un fruta i un kuminda kayente.”

Riba pregunta dje Parlamentario, e Minister a splika parlamento ku e instituto ‘Nos Welita’ ta kai bou di Ministerio di SOAW. “Konforme e “progamma van eisen” (programa di eksigensianan) di Ministerio di SOAW, e parti di kuido na hende grandi ta kai bou di e sektor di desaroyo sosial. Esaki ta nifiká ku e fundashon akí por bini na remarke pa risibí un supsidio na momentu ku e hasi un petishon ku ta kumpli ku e lei ariba menshoná. Te ku aña 2023, e fundashon a risibí supsidio serka e Ministerio di SOAW.”

Finalmente e Minister a splika riba pregunta di Parlamentario Seferina kiko e ta bai hasi pa e tipo di kasonan akí ku ta hinka trahadó i pashènt den problema, no sosodé mas. “For di sèptèmber 2023 e Ministerio a kuminsá un trayekto pa informá institutonan ku ta risibí supsidio riba e leinan di supsidio. Ta hopi riparabel ku e fundashonnan no ta na altura di e lei eksistente i ta pa e motibu akí e tipo di kasonan akí ta presentá. Pa evitá esaki, nos ta trahando duru pa por pasa e informashon di manera korekto na e fundashonnan”, asina e Minister a finalisá.