Willemstad – Ministerio di Salubridat, Medio Ambiente i Naturalesa (GMN) ta anunsiá ku awe, promé di desèmber 2023, dia mundial pa konsientisashon di e malesa di AIDS, a tuma lugá apertura di e Sentro di Salubridat Seksual Kòrsou na Servisio di Salú Públiko di Kòrsou, “Uitvoeringsorganisatie Geneeskunde & Gezondheidszaken” (UO G&Gz, ántes GGD) ku ta kai bou di e departamentu di “Infectieziektebestrijding” (IZB) situá na Piscaderaweg 49, Zakitó.

E sentro a habri su portanan pa den un espasio di ku ta reflehá trankilidat i ku e diskreshon nesesario, brindá kuido relashoná ku Salubridat Seksual, inkluso Malesanan Transmití Seksualmente (MTS).

Meta di e sentro aki ta pa brinda un ambiente sigur i inklusivo kaminda komunidat kompletu por buska sosten di kalidat serka un tim di profeshonal ku ta komprometé pa suministrá informashon korekto i konsehonan  personalisá na kada ken su situashon partikular. E kuido lo ta unu aksesibel pa medio di informashon, prevenshon i guia.

Den kuadro di e tópiko di Salubridat Seksual na Kòrsou, un otro meta di e sentro aki ta ku ya a kuminsá, ta pa inkluí tur organisashon ku tambe ta aktivo riba e tereno di Salubridat Seksual i malesanan relashoná ku esaki. Por bishitá e Sentro di Salubridat Seksual Kòrsou di djaluna pa djaweps di 8 or pa 11’or di mainta i di 2’or pa 3:30 di atardi. Riba djabièrnè e sentro ta habrí di 8’or pa 11’or di mainta.

Momentu ku ta deseá pa traha un sita òf ku ta deseá pa haña mas informashon por yama departamentu di IZB riba number di telefòn: 432 2860 òf 515 2860. Por WhatsApp tambe durantedi oranan di ofisina.

Pa mas informashon relashoná ku e komunikado aki, por tuma kontakto ku hefe di departamentu pa kombatí Malesanan Infeksioso, sra. Irálice Jansen, riba number di telefòn: 523 1530.