WILLEMSTAD,– Relashoná ku weganan di azar minister di finansa señor Javier Silvania a forma un grupo di trabou ku lo mester traha riba e lei nobo.

E lei ki lo mester regulá entre otro e supervishon independiente di e weganan di azar i e ehekushon i emishon di e lisensia.

Segun e minister, e lei nobo lo garantisá ku esnan ku tin lisensia pa weganan di azar na Kòrsou, lo aktua di akuerdo ku e leinan i reglanan di e paisnan riba kual nan ta enfoká. E lei nobo tambe lo tin medidanan pa kobra efektivamente e derechonan di lisensia serka esnan ku tin debe.

Ademas di mehorá e imágen di Kòrsou den e sektor global di gèmpel, kombatí labamentu di plaka i finansa terorismo, esaki lo mehorá e supervishon pa prevení disturbio den presupuesto di Kòrsou, segun Silvania.

E previshon provishonal di e ganashi di solamente e weganan di azar on line, por ehèmpel nan ta kalkulá di ta 40 mion florin pa aña. E aña aki e mitar di e ganashi ku ta ser kalkulá a keda inkluí den e presupuesto di pais. “Pa generá e ingresonan pa pais, e lei lo mester drenta na vigor mas lihé posibel”, asina Silvania a bisa.