WILLEMSTAD – Gobièrnu a bai di akuerdo ku ekstenshon di e periodo pa e asiná yamá mitigashon temporal di preisnan di kombustibel te fin di mart.

Na febrüari último a realisá un konsulta multisektoral tokante e tema akí. Durante e konsulta ei e Minister di Desaroyo Ekonómiko Ruisandro Cijntje di partido PNP a ekspresá e deseo di ekstendé e aviso pa mitigá temporalmente e preisnan di gasolin te na fin di mart dje aña akí, ku e meta pa krea mas espasio pa haña un solushon pa e ekseso di plaka kobrá na Curoil (i indirektamente e konsumidó tambe) na impuesto riba benta di posiblemente 34 mion florin.

Na mes momentu ku lo krea un espasio pa finalisashon dje proyekto di lei di Ordenansa ku ta regla e mitigashon temporal. Asina e direktor dje sektor di Maneho Finansiero i di Presupuesto a indiká ayera den un karta na Minister di Finansa Javier Silvania. E implikashonnan finansiero dje ekstenshon akí pa e presupuesto te ku fin di febrüari i despues te fin di mart ta kuantifiká di e siguiente manera. E presupuesto adoptá pa 2023 ta basá riba e realisashon den 2022, ku ta tene kuenta ku un pèrdida dje petishon di un suma total di 271 mion florin durante e periodo di 9 luna, òf aproksimadamente 3 mion florin pa luna. E aviso ta kubri e periodo di 12 di mei 2022 te 12 di febrüari, esta 9 luna.

P’esei un ekstenshon te fin di febrüari 2023 lo no nifiká niun pèrdida adishonal p’e presupuesto. Si amplia e aviso ku un luna mas, te fin di mart, lo tin un pèrdida leve di 3 mion florin pa e presupuesto di 2023. Sinembargo e preis di kompra aktual di kombustibel ta konsiderablemente mas abou ku e preis di kompra di mei 2022. P’e motibu akí e ‘omzetbelasting’ (OB) riba kombustibel ta kalkulá na solamente 1 pa 2 mion florin. Sinembargo, danki na e entradanan altu di OB na yanüari último, lo no tin pèrdida di entrada i e por apsorbá e konsekuensianan finansiero dje ekstenshon di e aviso denter dje presupuesto.

Durante e periodo di ekstenshon dje aviso, for di 12 di febrüari te fin di mart dje aña akí, e outoridatnan embolbí lo traha riba un solushon struktura pa eliminá e oumento di 24 sèn ku a drenta na vigor na momentu ku hala e aviso akí aden. Tambe ta trahando riba solushoná e problemá ku Curoil/e konsumidó a paga 34 mion florin dimás.