Rektifikashon: abogadonan di Nina Ansary ta den negosashon ku Banko Sentral riba rektifikashon.

NIEUWE HAVEN—Djaluna último, hues mr Pieter de Kort a trata un wisio sumario unda yu muhé di Hushang Ansary, Nina Ansary, a eksihí Banko Sentral rektifikashon den medionan di komunikashon. Ansary ta kulpa Banko Sentral di aktonan sivil kontra di su bon imáhen i ta eksihí rektifikashon.

Partidonan a drenta den konsulta pa yega na un entendimentu, pero djaluna tabatin un tratamentu. E kaso di Nina Ansary a bini despues ku e Tribunal di Tres Hues den Apelashon, a konstatá ku Nina Ansary no ta responsabel pa sakeo di aktivo for di Ennia Caribe Holding. For di durante tratamentu den Apelashon, Nina Ansary den korte a ninga di a kometé daño na bolsa di aktivo na Ennia Caribe Holding. Abogadonan di Nina, Rogier vd Heuvel i Roderick van Hees di e bufete di abogado Van Eps Kunneman van Doorn distanshá nan kliente for di tur akusashon sivil entamá pa Ennia Caribe Holding i Banko Sentral CBCS. Korte a duna nan rason tambe, pero entretantu publikashonnan di Banko Sentral a afektá imáhen di Ansary.

Nina ta bou di sosten di Roderik van Hees i Rogier vd Heuvel na e kantor di abogado Van Eps Kunneman. E dos abogadonan lokal ta traha huntu ku Susheel Kirpalani di Quinn Emanuel Urquhart & Sullivan na New York. Nina Ansary ta akshonista di Parman Capital kual ta e kompania ku ta operá Ennia i ku ta un kompania yu di Parman International. Korte na Kòrsou den Promé Instansha a konkluí ku e daño na Ennia a yega 1.1 miar florin. Korte den promé instansha mediante wes Eveline Nootenboom a dikta fayo pa Nina Ansary kubri 945 mion florin for di e daño okashoná na e kompania.

Pero Nina Ansary mediante un reakshon di su abogado, Rogier vd Heuvel, a distansha su mes for di niun intento di su tata pa yega na un areglo pafó di korte ku Banko Sentral. Nina tabata un akshonista pasivo di Parman International i no aktivo den mayoria di e desishonnan ku a kousa efekto riba solbabilidat di Ennia Caribe Holding.

Nina Ansary entretantu  a afirmá su claim internashonal ku e la hiba kontra di Banko Sentral. Nina Ansary ta haña ku CBCS mester paga no ménos ku 110 mion dòler pa kada un dje 9 demandanan imponé den su kontra. Ademas e ke pa e banko paga tur gastunan di interes, gastunan adishonal, inkluyendo salarionan rasonabel di abogadonan i gastunan adishonal ku a hasi pa e proseso sivil akí. Tambe e ke pa Korte disidí riba otro reparashon adishonal ku Korte ta konsiderá apropiá. Komo prueba Ansary ta usa entre otro loke èks direktor di CBCS José Jardim a bisa durante un konferensha di prensa konvoká na 2018 tokante e intervenshon den e grupo Ennia. Jardim a splika e dia ei ku Korte a aprobá e medida di urgensia ku CBCS a dekretá. Ansary tin un demanda internashonal tambe kual proseso ta den man di abogadonan, Dennis Hranitzky, Susheel Kirpalani i Daniel Salinas Serrano. Na Kòrsou e ta risibi sosten di e bufete Van Eps Kunneman ouspisiá pa Rogier vd Heuvel.

Ta konosí tambe ku Korte Sivil Sentral na Distrikto di California, a rechasá un petishon di kobransa ku Ennia Caribe Holding, mediante nan abogado Sabine Altena a inisiá kontra di Nina Ansary. Kasonan di kobransa den korte sivil na Estádos Unídos ta tuma lugá riba titulo personal, esta a prosesá e petishon di Sabine Altena kontra di Nina Ansary.

Hues Suzanne Sykes a trata e petishon i konkluí di ta rechasá e proseso di kobransa ku Ennia Caribe Holding a inisiá kontra di Nina Ansary pa 560 mion dòler estado unidense. Ta regardá un proseso entamá, den kuadro di ehekushon di e veredikto den promé instansha na 2021 di Hues Evelyn Notenboom na Kòrsou. Aparte na Kòrsou, Nina Ansary ta keda apsolv’é tambe riba teritorio estado unidense.