E mama a keda maltratá den oranan di mainta.

Nieuwe Haven,– Aktualmente e kaso penal kontra di Dishane Nelson ta den tratamentu den sala di korte.

E hóben ta wòrdu pèrsiguí di a asesiná pareha dje mama. E pareha lo tabata tin un historia pa maltratá e mama di Dishane Nelson. E hóben a keda kondená na un kastigu di 10 aña, pero komo ku e defensa di Dishane no tabata akuerdo ku e kondena, e hóben a opta pa trata e kaso di nobo den sala di korte di apelashon.

E hóben a keda tené na altura dje maltrato na momentu ku e tabata riba trabou. E hóben tabata traha na WTC i na momentu ku e mama a bèl dunando splikashon ku pareha Dwayne “Rick” Douglas a maltrat’é, mesora e hóben a bai den e direkshon. Mesora Nelson a kue un taksi pa bai den e direkshon i unabes na e sitio Dishane Nelson a kuminsá bringa ku Douglas. Segun splikashon di Nelson, den e forsageo un arma di kandela a kai for di Douglas i dado momentu Nelson a haña poder riba e arma. Mesora e hóben a opta pa lòs bala dirigí, kual a resultá fatal pa Douglas.

https://fb.watch/rJJffH-Id1/ (Klik pa wak Video)

E diskushon den sala di korte tabata si ta trata di un asesinato premeditá, pero e akusado a indiká ku e no tabata planiá pa asesiná ningun hende. Alabes e akusado a puntra hues kua yu lo ke wak su mama den un situashon maltratá? Tambe hues a puntra Dishane pakiko el a opta bai na e sitio, despues di a risibí informashon ku e mama a keda maltatá i akinan Dishane Nelson a kontestá e hues ku kada yu ku wak su mama den un situashon asinaki ke wak e situashon riba forma personal.

Segun Nelson e no a yega na e sitio ku ningun arma di kandela i esaki por keda konfirmá dor di diferente testigu na e sitio. Lamentabel ningun di e testigunan lo no tabata ke a testiguá esaki den sala di korte. Mas aleu, Nelson a indiká ku un ruman di e víktima defuntu tambe a wak e hóben baha sin arma, pero lamentabel e ruman aki tampoko lo no ke a testiguá.

Un video ku tabata sirkulá riba retnan sosial tambe tabata riba pantaya den sala di korte. Riba e video aki por a nota ku apénas e mama di Nelson por a kana despues di a risibí leshon nan despues ku Dwayne Douglas lo a maltrat’é.