Segun representantenan di kranshi, ya pa algun tempu kaba bo mester presentá ku informashon adishonal pa asina kompletá bo inskripshon.

Willemstad,– Lei aktual ta stipulá ku ámtenar na kranshi por pidi pa dokumentashon adishonal na momentu ku un persona inskribí na un adrès nobo. E dokumentashon adishonal mester verifiká ku e persona tin e derechi pa biba na e adrès. 

Al kontrario di rumornan insistente, kranshi no ta pèrmití pa un persona inskribí na un adrès sin dokumentashon adishonal. Vigilante a tene un kòmbersashon ku representante di kranshi kende a splika ku na momentu bo inskribí, empleadonan di e instituto estatal tin e derechi pa pidi dokumentashon adishonal na momentu ku inskribí na un adrès nobo. E dokumentashon adishonal por ta entre otro, kòntrakt di hür, prueba di kompra di e kas òf outorisashon di doño di kas. Leinan vigente ta indiká alabes ku e persona ku inskribí mester entregá dokumentashon nesesario pa asina kompletá su inskripshon den e registro atministrativo básiko. 

Hefe di asuntunan públiko, Ruthline Haddocks a splika ku ántes enbèrdat por a inskribí na un adrès sin ningun verifikashon, pero e último 5 añanan e situashon a kambia. Aktualmente e registro ta wòrdu mehorá tiki tiki i esaki ta sosodé na momentu ku e ámtenar pidi pa verifikashon adishonal di adrès.

E leinan vigente pa inskripshon na un adrès ta obligá un siudadano na inskribí na Kòrsou na momentu ku e biba 66% di 6 luna na Kòrsou òf na momentu e siudadano muda pa un otro adrès. Sinembargo, un siudadano mester kita su nòmber for di den e registro na momentu ku e bai biba 66% di 6 luna riba e islanan manera BES, Aruba òf St Maarten.

E registro básiko riba su turno lo tin informashon tokante nashonalidat, prueba di legalisashon, informashon di sédula i muchu mas.

Aunke e leinan aktual ta papia tokante obligashon pa inskribí den e registro básiko, e leinan no ta papia ku e siudadano tin e obligashon pa entregá e dokumentashon nesesario. E lei ta duna oportunidat pa pidi tur loke ta nesesario durante e proseso di inskripshon i adaptashon di un adrès.

E notisia ariba menshoná a bira punto di diskushon na momentu ku un dama no por a haña rebaho di hür sosial debí ku un “deskonosí” tabata inskribí na e kas. Segun e dama, su ònderstant a baha, pues e por a bin na remarke pa un rebaho di hür na FKP. Pa risibí e rebaho, e dama mester a pidi dokumentashon adishonal di kranshi pa prueba ku e dama i su yunan ta biba na e kas. Pa e dama su sorpresa, kranshi a indiká ku tin un persona maskulino ta bibando na e kas, pues e dama mester prueba riba un otro manera ku e persona maskulino no ta habitá den e kas na Muizenberg.

Al final e dama a presentá ku su prueba di hür kual tabata duna sufisiente indikashon ku e persona “deskonosí” no ta biba den e kas i ta inskribí riba un forma “ilegal” na e kas di FKP. Tambe kranshi a manda un karta pa e persona deskonosí ku inisial E.M indikando ku basá riba leinan vigente, e hòmber E.M ta obligá na inskribí na un adrès. Tambe kranshi a indiká den e karta ku aktualmente E.M ta riba lista di “adrès deskonosí”.

Kranshi no ta menshoná dokumentashon adishonal pa verifiká adrès riba wèpsait

Wèpsait di gobièrnu no ta hasi menshon ku mester presentá ku dokumentashon adishonal pa asina verifiká adrès. Segun e wèpsait titulá “Inschrijven in het Bevolkingsregister van Curaçao” mester entregá solamente un pasaporte bálido i si akaso e siudadano no tin nashonalidat Hulandes e persona mester presentá ku un pèrmit bálido.

Riba e página digital ariba menshoná no ta hasi ningun menshon ku mester di dokumentashon adishonal pa verifiká adrès.