Peppie Sulvaran

Nieuwe Haven—Segun abogado Peppie Sulvaran, den kaso kontra di su kliente Anthony Bhajan, Ministerio Públiko no por súplika petishon pa ekstraditá un persona i despues ta kambia e base. Esaki ta lokual a tuma lugá segun e abogado, kende a súplika korte pa “drop” e kaso kontra di su kliente.

Den kaso di su kliente, e petishon di ekstradishon, e dekreto di ekstradishon di Kòlombia, manera tambe e orden di detenshon ta papia klá riba e anochi di 30 di òktober 2016 òf “op of omstreeks 30 di oktober 2016”. Ministerio Públiko na momento e kaso a yega korte djabièrnè último, a kambia e akusashonnan, diferente for di lokual Colombia a permití ekstradishon. Aparte ku Ministerio Públiko kier kambia e periodo di e akusashon, segun Sulvaran Ministerio Públiko ke amplia tambe riba e akusashonnan. Segun Sulvaran, de e dekreto for di Colombia, tampoko tin akusashon di partisipashon den un organisashon kriminal. Segun Ministerio Publiko, su kliente lo a partisipá e dia ei, òf rònt e dia ei, den un organisashon kriminal huntu ku Timucin i/o W. i/o otro deskonosí. E akusashon aki ta basá ariba solamente deklarashonnan kontradiktorio di Timucin. E hòmber W. a deklará na korte ku e no konosé Bhajan en apsoluto. Timucin, manera W., a ser sentensiá solamente pa partisipashon den un kaso di Opiumlandsverordening/droga. Aparentemente, solamente Bhajan ta keda akusá den e organisashon kriminal ku ta menshoná den e akusashon. KU e organisashon kriminal, Ministerio Publiko a referí na No Limit Soldiers.

Segun Sulvaran, pa bo por akusá i kondena un persona pa ta miembro di un organisashon kriminal mester tin pruebanan kombinsente. E abogado a menshoná algun ehèmpel den desishon di Korte Supremo, kual den kaso di su kliente no tabata presente. Tokante un organisashon kriminal den anochi di 30 di òktober 2016, kual ku e sospechoso ta nenga su parti den esaki, no tin detaye adishonal algun. Muchu mas no tin pruebanan di e eksistensia di un organisashon duradero i strukturá entre esnan menshoná den e akusashon, di kual aparentemente ningun di nan konosé otro. Segun hurisprudensia, mester tin un koperashon duradero i struktural entre su kliente, Timucin i/o W.  i terseronan ku no a sali na lus durante e kaso.

Finalmente segun Sulvaran, Ministerio Públiko a trese e akusashon aki, komo novedat pero no esei so, no tin prueba pe tampoko. pa por papia di un ‘organisashon’ manera ta menshoná den artíkulo 2: 79 di Kòdigo Penal, mester tin un ‘koperashon duradero’ ku un ‘struktura sigur’, ku ta enfoká riba kometé krímen.