Den e edishon di e charla a duna informashon di medidanan pa asina resèt lifestyle i manehá e kuerpo i mente den e periodo di menopousa.

WILLEMSTAD, — Dia 18 di òktober último tabata dia Internashonal di Menopousa. Den esaki InPerson a duna un charla na Roosevelt Event Center den parti atardi.

Dia 18 di òktober na Roosevelt Event Center, tabatin un charla bastante informativo den kuadro di menopousa. Na e evento aki tabatin entre otro, un oradó spesial ku a bin konta esnan presente tokante di e sistema kardiovaskular. E señora aki ta bin kompartí su historia ya komo e señora a haña ataka di kurason na e edat di 51 aña. Chantall Regales di InPerson, ta menshoná ku den menopousa problemanan kardiovaskular ta oumentá i ta pa esaki ta hopi importante pa tin un lifestyle saludabel.  Chantall Regales ta un terapeuta di hormona i ta menshoná e importansia pa tin konsientisashon di menopousa.

E konsientisashon aki ta konsistí di e efektonan ku menopousa tin hende riba muhé.  Den periodo di menopousa tin kambionan di hormonal bastante grandi. Tin un desbalanse den hormonanan manera ‘estrogeen, progesterone i testorone’. Den e periodo aki e nivel di e hormona ‘estrogeen’ ta baha. No ta tur persona ta haña e mesun simptomanan den periodo di menopousa. Esaki ta diferensha pa kada persona. Algun síntoma di menopousa ta kalor eksesivo, sodó, kambio di humor, kurason ku ta bari duru, dolo’i kabes, doló di spier, sobrepeso, i tambe pèrdida di kabei.

Den e periodo aki mester ta konsiente riba e síntomanan i  tambe kon pa atendé ku esakinan. Tambe Chantall Regales ta menshoná ku e periodo di menopousa ta un periodo den kual un persona ku tin esaki ta mas vulnerabel. Por ehèmpel, si tur ten un hende semper a funshoná den un ofisina ku ta kalor, denter di e periodo di menopousa, e chèns ta grandi ku e no por soportá esaki mas. Tambe debí na desbalanse hormonal, e hende muhé por sintié hopi mas kansa ku normal. Tambe tin sierto tela di paña ku por influenshá e persona ku ta pasando den menopousa.

Chantall Regales  ta menshoná ku esaki esakinan ta ehèmpelnan di kosnan chikitu pero ta sumamente importante pa sa e pida informashonnan aki. Chantall Regales ta menshoná ku maneho di stès, moveshon, i kuminda ta yuda pa asina tene e kurpa den balansa durante di periodo di menopousa. Ta importante pa kuida di salú for di edat yòn. Si huma, mester tene na kuenta ki e efektonan ta di esaki na momentu ku e persona tin menopousa.

Chantall Regales ta menshoná ku no ta hende muhé so ta pasa por medio di kambio natural na edat grandi, pero tambe hende hòmber. Pa hende hòmber nos ta yama esaki ‘andropausa’. Tantu den menopousa komo den andropousa, hende muhé i hende hòmber ta vulnerabel pa diferente síntoma. Serka hende hòmber por wak síntomanan manera por ehèmpel, kambio físiko, i tambe kambio di humor. Pues, e periodo di kambio di hormona den kurpa di hende hòmber i hende muhé ta hasi tur dos mas suseptibel pa preshonnan eksterno.

Chantall Regales ta enfatisá ku kuido di salu ta importante for di edat yòn i ku esaki ta un mester ora tin menopousa.