Tur dia di nobo maltrato di bestia ta wòrdu kubrí riba ret sosial.

Willemstad,– Tantu riba ret sosial komo instanshanan privá ku ta kita kachó for di kaya ta puntrando kiko lo sosodé ku e kachónan di kaya unabes nan wòrdu kitá for di kaya. E preguntanan a kuminsá despues ku Dierenbescherming Curaçao a kuminsá pidi yudansa di hende ku ke yuda kita kachó for di kaya.

Djarason último riba Facebook Dierenbescherming Curaçao a publiká un anunsio urgente pa haña hende ku lo ke yuda kita kachónan for di riba kaya. Mesora diferente komentario a ser publiká puntrando kiko lo sosodé ku e kantidat di kachó i pushi ku lo keda kitá for di kaya. Un di e komentarionan a asta bira diskushon amplio den sekshon di komentario kaminda un persona a splika ku tin otro solushon ku djies laga manda e bestianan di kaya “drumi”.

E lei di bienestar di bestia a stipulá ku un doño di un bestia di kas tin 7 dia pa rekohé su kachó òf pushi na e instansha konserní. Kada dia ku e doño dura pa buska su bestia e lo mester paga un multa di 10 florin pa dia. Akaso 7 dia pasa i ningun doño a bin buska nan bestia, e bestia di kas lo bira propiedat di Dierenbescherming Curaçao. Representante di Dierenbescherming Curaçao, Maria Garcia, a indiká ku unabes e bestia di kas bira propiedat di Dierenbescherming, e organisashon lo hasi su máksimo esfuerso pa buska un kas pa e bestia. Pero e realidat ta ku tin prueba ku tin 6 mil bestia di kas riba kaya. Den mésun rosea Garcia ta agregá ku no tin 6 mil kas ku ta buskando un bestia pa adoptá. Esaki ta krea e situashon lamentabel kaminda mester laga un gran kantidat di bestia di kas “drumi” debí ku no tin otro solushon.

Segun Garcia, Dierenbescherming ta kanando un trayekto pa establesé un tereno spesial pa kachó, pero ta ainda esaki no ta operashonal. Ainda e tereno falta akseso di awa, pues te ainda no por usa e tereno pa tene e kachónan. Tambe Garcia a indiká ku unabes operashonalisá e tereno pa kachó, e tereno lo tin un kapasidat di 300 kachó, pues ainda tin 5700 kachó ku lo no tin un hogar.

For di novèmber aña pasá Dierenbescherming Curaçao a kuminsá duna charlanan informativo tokante maltrato di bestia. Maria Garcia a splika ku aktualmente tin 17 skol ku ta risibí charlanan tokante e tópiko kual por sierto ta positivo.

E lei di bienestar di bestia a drenta na vigor riba 1 di yanüari 2023. E lei a keda kubrí basta ekstensivo den medionan di komunikashon. E lei lo keda ehekutá dor di Dierenbescherming Curaçao kaminda e organisashon lo risibí entre 250 mil pa 300 mil na supsidio pa asina ehekutá inspekshon nan. Den e lei tin stipulá ku tur doño di bestia tin e deber pa registrá nan bestia di kas usando un “ISO-Chip”. Tambe e lei ta splika den kua kaso por papia tokante maltrato di bestia. Akaso un persona kibra ku e lei e por risibí un kastigu maksimal di dos aña den prizòn òf un multa máksimo di 25 mil florin.

Diario por nota kon kasonan di maltrato ta keda publiká riba retnan sosial.