Willemstad—Kanal di televishon Nos Pais, selebrando su di désimo aniversario, lo transmití pa di dos aña konsekutivo e torneo internashonal di Serie del Karibe ku e aña aki ta tuma lugá na Miami. Un i tur por mira selekshon di Kòrsou reforsá ku peloteronan di Reino partisipá na un Seri di Karibe di beisbòl, ku ta primintí di bira inolvidabel. Nos Pais Television ofisialmente a atkerí derechinan eksklusivo pa transmishon di tur wega durante e torneo di beisbòl mas grandi den Karibe i Latino Amérika.

Seri di Karibe 2024 ta un evento deportivo di beisbòl profeshonal ku lo tuma lugá di 1 pa 9 di febrüari 2024, na Miami den LoanDepot Park. E seri ta reuní den un torneo final, ekiponan kampeon profeshonal di Venezuela, Repúblika Dominikana, Puerto Rico, Mexico, Panamá i Colombia. I pa di dos biaha den historia, Kòrsou ta partisipá.

E klásiko karibense i latino amerikano ta drenta su di 66 edishon i pa Kòrsou esaki ta un desaroyo históriko. Kòrsou ta hunga un kantidat di 7 wega preliminar durante e promé rònt i ku bon resultado lo hunga rònt nan di ‘play off’.

Nos Pais Television, den un logro históriko i eksklusivo ta trese tur 25 wega durante Seri di Karibe, te den boso kas. E posibilidat a bira un realidat na momento ku direktora di e planta, Mavis Albertina a firma ku representante di e Kon-federashon di Beisbòl Profeshonal Karibense. Un grupo bastante grandi di hungadónan profeshonal Yu di Kòrsou na Estádos Unídos i demas kampeonatonan internashonal a konfirmá nan partisipashon, inkluso Jonathan Schoop, Jurickson Profar, Didi Gregorius i Andrelton Simmons.

E Tim di naradó kustumbrá pa Nos Pais Television kargá ku eksperensia internashonal lo ta presente un biaha mas pa kompartí kada detaye. E tim ta konsistí di Alexander Makaja, Clarck Zalm, Gino Valeriaan, Jair Quant i for di Boneiru lo tei Kumar Piar. 

Nos Pais Television ala bes ta gradisí su patrosinadónan di e proyekto históriko aki, ku ya kaba a konfirmá nan sosten. Finalmente un pabien i danki ta bai na e pueblo di Kòrsou ku e gran logra aki.