Javier Silvania: notarionan te ku novèmber 2022 depositá kasi 47 mion florin na Impuesto di Traspaso.

Punda—Un suma di kasi 47 mion florin a bai den kaha di gobièrnu mediante depósito di notarionan riba banko pa pagamentu di Impuesto di Traspaso (Overdrachtsbelasting). Esaki ta lokual sifranan presentá pa minister di finansa públiko, Javier Silvania a indiká.

E notarionan pa lei ta enkargá pa kobra e impuesto riba un kuenta transitorio na momento benta di bienes inmóbil (tereno, kas ets) tuma lugá. Segun Silvania, durante 2022 e notarionan te ku novèmber 2022 a depositá kasi 47 mion florin riba kuenta di gobièrnu pa kanselá e debenan di Impuesto riba Traspaso. Durante 2022, e kobransa a tuma lugá den e siguiente forma, Yanüari –te ku Yüli tabata kobrando 2,6 mion pa luna, Ougùstùs: 5,6 mion, Sèptèmber 2022: 8,8 mion, Òktober 10,4 mion i finalmente Novèmber 2022: 3,6 mion. Ainda no ta konosí kuantu e impuesto pagá pa Desèmber ta.

Segun Silvania, su maneho a hasi posibel pa yega na un subida supstansial di impuesto ku ta bini di notarionan. A nota ku pa Novèmber tabatin un bahada den e kobransa,  pero esaki lo wòrdu evaluá i i sigui monitoria e notarionan na un manera struktural, segun e minister a splika. Huntu ku Servisio di Maneho Urbano, Servisio di Impuesto  a entrega spesifikashonnan na Kadaster di datonan deseá. Lo risibi oferta di Kadaster den Yanüari 2023 pa despues kuminsá ku e interkambio di data pa aktualisá e sistemanan di OZB i Erfpacht. Segun Silvania, a tene reunionnan pa e interkambio di informashon entre Impuesto i Kranshi na Boneiru, pasobra Boneiru ta husa e mesun sistemanan ku Kòrsou. Lo tene reunion ku Kranshi den tèrmino kòrtiku pa eksplorá si por realisá mesun interkambio di informashon na Kòrsou tambe.  

Silvania, komo minister di finansas a pone bastante énfasis pa kobra retraso den impuesto. Esaki tabata nesesario pa por kumpli ku kondishonnan imponé den COHO/Pakete di Pais. Segun e minister, riba kaya tin teorétikamente un suma di 5.2 bion na impuesto retrasá, pero e sifra no ta unu realista. E minister a bisa ku e suma di debe di prima sosial i impuesto sin multa ta 5,2 bion florin. Segun Silvania, a hasi kalkulashon na 2019 ku e debe real tabata ménos ku 1 bion (esta kitando e suma prekalkula). Segun Silvania, pero debe real no kemen ku tin sèn pa kobra. Un debe por ta real pero si debedor no tin sèn pa paga, no por kobra. Por konkluí ku montante ‘riba kaya’ ta hopi mas abou di e 1 bion, e minister a splika parlamento djaluna último. Ta hasiendo limpiesa di e

Bolsa di retraso riba pago, pa den transkurso di e dianan benidero yega n un suma mas realista, segun e minister.

E minister a elaborá riba e problematika di privasidat di informashon. Segun e minister a komprondé ku Aqualectra a indiká na  promé instansha ku nan datonan ta privá i ku p’esei no por hasi interkambio di informashon ku Impuesto. Gobièrnu lo drenta den kontakto ku Aqualectra un bia mas pa eksplorá bou di kua kondishonnan  por haña sierto dato tòg (por ehèmpel adrès aktual di siudadonan).  

Finalmente pa lokual ta trata pago di restitushon, segun Silvania e la a pone mas prioridat riba pagamentu di restitushon ku ántes. Servisio di Impuesto tin diferente trabou pa hasi i dor di stipulá metanan i monitor esakinan ta pone ku servisio di impuesto ta kumpli pa asina eliminá e retrasonan den pagamentu di restitushon. Segun e minister, ta monitor pago di restitushon tur siman.