Nieuwe Haven: Bertie Braam na Korte den kompania ku representantenan CPR Holding.

Nieuwe Haven—Miéntras Refineria di Kòrsou ta negoshando ku un grupo nobo, Oryx Petroleum, eks sosionan di Caribbean Petroleum Refinery BV i Holding ta sigui den korte. E interes no ta Refineria di Kòrsou mas, sino un bataya interno pa kontròl di  e kompania despues ku e plan stratégiko a “kai na awa”.

Ayera den un reakshon na Vigilante, abogado di CPR Holding Bertie Braam a konfirmá ku e proseso ta sigui den korte e siman aki. E kaso ta bira e di 8 kaso den korte, relashoná ku problemanan kousa pa eks sosionan den e konsorsio aprobá pa Refineria di Kòrsou pa e.o. maneho na Bullenbaai. No ta konosí kiko e interes pa kontinuá e kaso lo ta, pasobra CPR no ta kandidato mas pa maneho na Isla pero tampoko na Bullenbaai. E todo kaso tin un proseso sivil programa e siman aki. E biaha aki ta CPR Holding kontra di CPR BV i Birux di e Erchenel Doran, eks sosio den CPR Holding. CPR Holding ta representá pa e venezolanonan, Soccoro, Taborda i Marquez.

Tabata riba 14 Yüni 2022 na ofisina di notario Moerdijk a establesé a kompanianan Caribbean Petroleum Refinery Holding (CPR Holding) i Caribbean Petroleum Refinery BV. . A keda kumbiní pa emití i depositá un kantidat di 200 akshon. Partidonan a keda kumbiní pa deponé tur e akshonnan riba nòmber di e kompania ku a establesé, Doran Global Investments. Den e kompania menshoná, Erchenel Doran tabatin tur akshon i tabata úniko direktor.

A keda kumbiní tambe pa inskribí Marquez, Socorro i Doran komo direktor na CPR BV . Despues tambe a laga inskribí Luis Giusti komo direktor na CPR BV. Den e holding partidonan a kumbiní pa laga inskribí Doran, Giusti, Mouada Chaar Chaar i Billy Steblina komo direktornan. Despues ku e grupo tabata den proseso di bidding pa maneho na Refineria Isla, diferente iregularidat a kuminsá tuma lugá unda durante tratamentunan den Parlamento a bin sali na kla ku e.o. tabatin falsifikashon. Na Mart 2023, segun abogadonan di e grupo venezolano tabatin diferente reunion entre nan pa kumpra akshonnan di Doran Global Investments for di CPR Holding. Tabata e intenshon pa mantené solamente 2 akshonista den CPR Holding, Socap Corporation di Socorro i Business Security LLC di Marquez. Segun e grupo venezolano, a produsí e dokumentonan nesesario pero Echerel Doran nunka no a firma pa ofisialisá su salida for di e holding.

Riba 24 di mart 2023,  Marquez Socorro i Giusti a risibi un karta for di un kompania nobo, Birux Investments BV, ku nan no ta forma parti mas den maneho di CPR BV. Ta bin resultá ku Birux ta un kompania 100% propietario di tur akshon den CPR BV i ta establesé for di 13 di yanüari 2023 pa Echerel Doran. E venezolanonan a pensa mesora e akshonnan di CPR Holding a keda traspasá pa Birux Investments. Esaki a lanta tur sospecho serka e grupo venezolano ku e traspaso di akshon pa Birux tabata ilegítimo. Tabata opvio tambe ku entre e grupo venezolano i Doran, ya no tabatin union mas.

Erchenel Doran a tuma su mes retiro for di CPR Holding i registrá esaki den Kámara di Komersio, unda CPR Holding a keda konsiderá komo kompania deskontinuá. Den e kaso ei a sigui pa nombramentu ofisial di Socorro, Marquez i Taborda komo e direktornan di CPR Holding. Na momento nan a aserka Kámara di Komersio pa restablesé nan mes komo direktor na CPR Holding, Kámara di Komersio no a koperá.  Entretantu na Kámara di Komersio a pone hinter e file di CPR Holding “on hold” i fris tur modifikashon te na momento wes mester tuma un desishon. Socorro, Marquez i Taborda, a akudí na Korte pa duna un veredikto unda nan por haña kòntròl bek riba CPR BV tambe. E kaso entamá ta CPR Holding kontra di CPR BV i Birux.