ROTTERDAM—Ministerio Públiko a atvertí Erasmus MC pa e hòmber ku djaweps a keda detené pa e tiroteonan den Rotterdam.

Den un karta OM a informá ku e studiante diferente biaha tabata den kontakto ku polis. E karta di OM ta riba internet. Un bosero ta konfirmá ku ta trata di un karta verediko. OM a skirbi e karta pasobra Erasmus MC kier a duna e hòmber e diploma di dokter básiko. OM tabata ke pa hospital konsiderá ku e hòmber tabatin kontakto diferente biaha ku polis i hustisia, loke a resulta den un kondena den korte di Rotterdam. E hòmber tabata den kontakto ku hustisia pa motibu di maltrato di bestia segun dokumentonan di korte. Asina den yanuari e mester a presentá den korte pa maltrato di bestia. Den 2021 el a keda kondena pa dos maltrato. Den e kaso testigunan a meldu ku e hòmber a mustra komportashon preokupante.

Testigunan a deklará ku e tabatin komportashon sikotiko, ta hari duru i ta grita segun OM den e karta. Riba su selular OM a haña imagennan violento i ekstremista. OM a mustra Erasmus MC ku nan a duna e informashon komo atvertensia den otorga diplomanan di dokter. No ta kla ki dia a manda e karta. No ta konosí si Erasmus MC a tuma akshon despues di e atvertensia di OM. E hospital no tabata disponibel pa komentario. E sospechoso (32) di Rotterdam a keda detené djaweps despues di dos tiroteo den siudat ku saldo di tres morto. E promé insidente a tuma lugá den un kas den Rotterdam-West kaminda un dama (39) i su yu muhé (14) a pèrdè nan bida. Djis despues el a lòs tirunan den sentro di edukashon di Erasmus MC kaminda un dosente (43) a pèrde su bida. Polis ta konsiderá ku ta trata di un akshon dirigí. Polis no ta buskando mas sospechoso. Durante un rueda di prensa OM a konfirmá ku e hòmber a keda kondena pa maltrato di bestia.