Ke determiná e bèrdat pa loke ta trata debe astronómiko ku a akumulá durante konstrukshon di hospital nobo CMC.

Willemstad, — Komishon Enkuesta Hospital Nobo Otrobanda ta enkargá ku investigashon di debe astronómiko ku a ser akumulá dor di hospital nobo CMC. Resultado di e investigashon aki ta un rapòrt ku lo keda entregá na Ministerio Públiko(OM).

Parlamentario Gwendell Mercelina di frakshon PNP a indiká ku e enkuesta parlamentario ta un investigashon den kual ta hasi konsulta ku siudadanonan pa lokual ta trata e proseso di konstrukshon di hospital nobo ya komo esaki a generá un debe astronómiko.  Mercelina a indiká ku no ke pa un kos asin’aki pasa mas pues ta hasi investigashon den kual ta traha un rapòrt. E resultado di e investigashon  ta un rapòrt ku lo kedá entregá na OM pa asina OM por hasi un investigashon mas profundo den e debe astronómiko ku a generá durante konstrukshon di CMC.

Mercelina a indiká ku pueblo tambe ta un di e stakeholders ku ta involukrá den e proseso investigativo pa asina finalisá e rapòrt ku mester kedá entregá na OM.  Den e proseso aki lo kuminsá ku e proseso interogatorio interno den kual ta tuma informashon di e personanan ku tabata envolví den e konstrukshon di CMC. Gwendell Mercelina ta splika ku e interogashon interno aki ta un instrumento di ‘Staatsregeling’ i for di luna di desèmber lo kuminsá ku e interogashon interno aki.

Segun Gwendell Mercelina no ta trata aki di un enkuesta sosial pero mas bien un enkuesta parlamentario den kual ta hasi ‘burgerconsultatie’ na Banda Bou i Banda Riba. E enkuesta investigativo parlamentario aki ta un proseso den kual no ta kompartí informashon te ku ora e proseso investigativo ta kla. Pues den e ‘burgerconsultatie’ ta informá siudadonan i tambe asina wak kiko nan sa riba e tópiko. Gwendell Mercelina a kompartí ku e enkuesta parlamentario ta un proseso pa investigá kiko e debakel di konstrukshon di e hospital nobo tabata.

E meta di e ‘burgerconsultatie’ ta pa mehorá e desishonnan demokrátiko, pa tuma na konsiderashon diversidat di opinion i perspektivanan, i pa pone desishonnan mas na liña ku e nesesidat i deseo di komunidat. Parlamentario Eduard Braam presidente di e komishon enkuesta HNO, a infatisá ku e enkuesta no ta un tribunal i ku e komishon ke pa e hechonan ta konosí.