WILLEMSTAD – Komishon Sentral di Parlamento a deliberá djárason último ku “Orde van Avocaten” tokante e konsepto di lei ku ta regla weganan di azar “Ontwerplandsverordening houdende regels betreffende kansspelen”. Miembronan di Parlamento a haña e oportunidat di hasi pregunta den e úniko tanda. Despues di ku a skòrs e reunion pa algun ratu, e representantenan di e Orden di Abogadonan a kontestá e preguntanan.

E punto prinsipal ku Orden di Abogadonan tin kontra e lei LOK ta relashoná ku artíkulo 5.17 insiso 1b, ku ta trata akreditashon di abogadonan dor di Curaçao Gaming Control Authority (GCA). E kambio ku Minister di Finansa Javier Silvania a hasi no ta na nan satisfakshon, pasó e ta krea desigualdat entre abogadonan. E Orden a pone miembronan di Parlamento tambe na altura di nan preokupashonnan i a presentá un argumento detayá tokante e implikashonnan di e areglo proponé.

E direktiva di Orden di Abogadonan ya den dos karta dirigí na Silvania anteriormente, a ekspresá nan punto di bista, enfatisando riba posibel desigualdat, violashon di seguridat hurídiko i posibel konflikto ku supervishon eksistente. E opheshon prinsipal ta e kambionan proponé den artíkulo 5.17, tokante akreditashon di abogadonan dor di GCA. Ounke Minister Silvania a proponé un solushon den su karta di 24 di aprel último, pa kambia e palabra “akreditashon” den “sertifikashon, e Orden di Abogadonan ta keda preokupá tokante e konsekuensianan di e areglo akí pa abogasia na Kòrsou.

Un di e puntonan prinsipal di preokupashon ta ku e ta krea desigualdat entre abogadonan. Dor di introdusí sertifikashon, ta implísitamente sugerí ku abogadonan sertifiká ta superior na nan koleganan ku no tin sertifikashon. Esaki por kondusí na un repartishon desigual di trabou. Ademas tin e posibilidat ku CGA na kualke momentu por imponé kriterionan adishonal i reglanan, loke por krea abuzu di poder.

Ademas abogadonan ta bou supervishon di Korte, Raad van Toezicht op de Advocatuur (hunta di supervishon riba abogasia) i Raad van Appèl op de Advocatuur (hunta di apèl riba abogasia) kaba. Introdusí ku CGA ta bai hasi supervishon, por kondusí na konflikto i falta di klaridat tokante e podernan/outoridatnan di e diferente instansianan di supervishon.