Minister Hato i su tim.

WILLEMSTAD – Parlamento a trata e proyekto di lei pa establesé reglanan pa loke ta trata modèlnan yamá ‘Modellenlandsverordening’ ayera, i a aprobá esaki. Segun Minister di Hustisia Shalten Hato, e ordenansa ta e base legal pa un servisio nobo ku Ofisina pa Propiedat Intelektual di Kòrsou lo ta enkargá kune.

Ofisina pa Propiedat Intelektual ta un entidat públiko independisá ku ta resortá bou di responsabilidat polítiko di Minister di Hustisia. Na febrüari último, despues di un reunion kòrtiku den Komishon Sentral den kua Parlamentarionan no a hasi niun pregunta tokante e proyekto, a disidí ku e proyekto di lei ta kla pa tratamentu durante un reunion públiko, ku a tuma lugá ayera.

Parlamento a risibí e proyekto di lei aña pasá. E lei di diseño ta referí na protekshon di e apariensia di un produkto. Asina gobièrnu ta splika den su Aklarashon tokante dje proyekto di lei. Den e ordenansa nashonal a opta pa usa e término ‘modèl’ pa referí na tantu e dibuhonan (e apariensia bidimensional di un produkto), komo e modèlnan (e diseño eksterno tridimensional di un opheto). Por ehèmpel e por ta un dibuho den forma di patronchi di papel ku ta ‘behang’ muraya kuné. No ta trata di e protekshon di e dibuho riba su mes, sino dje protekshon di e produkto ku ta atkerí un apariensia diferente ku e dibuho. E derecho di diseño ku esun ku a pidi esaki ta haña, ta inkluí un rekurso legal ku por usa pa kombatí entre otro e falsifikashon òf pirateria durante un periodo determiná.

“Pa medio di e ordenansa kreadornan di diseñonan nobo, lo haña un derechi eksklusivo pa hasi negoshi ku e aparensia nobo ku nan a kreá di e produkto. E lei ta eksigí pa un diseñadó haña e derecho di modelo, ku e aparensia ku el a krea mester ta nobo i mester tin un propio karakter. Nobo ta nifiká ku e modelo no tabata konosí niun kaminda promé, ni a entregá niun otro modelo idéntiko pa protekshon promé ku esun di e diseñadó. Un karakter propio ta nifiká ku e impreshon ku e modelo di e diseñadó ta duna na esnan ku konosé e materia, mester ta diferente for di lokual ta eksistí kaba. Esun ku konosé e materia mester por mira algun aspekto di diferensia entre e modelo nobo i esunnan ku ya tabata eksistí anteriormente.”

E maneho di e lei lo ta na enkargo di Ofisina pa Propiedat Intelektual, kaminda mester entregá tur petishon pa protekshon. “E lei lo duna tambe trabou na personanan ku por traha komo apoderadó i representá interesnan di klientenan ku tin nesesidat pa representashon den asuntunan relashoná ku protekshon di modelo. Por último e lei ta krea e posibilidat pa den un futuro, ku nos ta spera lo ta serkano, e posibilidat pa registrashon internashonal di modelo por drenta na vigor. Esaki lo hasi posibel pa siudadanonan di Kòrsou por haña protekshon pa ku e derecho di modelo mas fásil den diferente otro pais, pero tambe ku stranheronan lo por pidi protekshon internashonal di e derecho di modelo pa e teritorio di Kòrsou mas fásil.”