PARERA—Eks miembro di Parlamento, Dean Rozier por ta unu di e motornan tras di e akuerdo entre PDVSA i Refineria di Kòrsou anunsiá desèmber 2023. Rozier, kende tabata presente di e anunsio, na dos okashon no a duna reakshon riba preguntanan di Vigilante.

Na desèmber 2023 Refineria di Kòrsou a anunsiá un dil ku PDVSA a sera. Ta trata pago di un debe atrasá di PDVSA, kual lo tuma lugá den forma di entregá produktonan petrolero. E anunsio ta tuma lugá den kompania di demas miembronan den kabinèt Pisas II, na Amazia na Parera. Pisas a manda un invitashon ofisial na demas miembronan di su kabinete. Manera Vigilante a publiká na Novèmber último, bishita ku minister Charles Cooper i direktor di Refineria di Kòrsou, Patrick Newton a hasi pa Venezuela, riba aprobashon di Promé Minister Pik Pisas, a solushoná un problema mionario entre PDVSA i Rdk.  E problema aki lo ta tópiko di diskushon  pa dos motibu. Unu ta trata e repago na penshonadonan di Refineria Isla PDVSA BV i Kontratistanan. E di dos ta trata posibilidat pa Refineria di Kòrsou por kuminsá “trade” den produktonan petrolero.

Algun luna promé, na Òktober 2023, Refineria di Kòrsou (RdK) a firma un Memorandum of Understanding (MoU) ku Oryx Petroleum Limited (Oryx Petroleum) pa yega na un partner adekuá pa maneho i operashon di nos refineria i Bullenbaai.  E MoU aki ta stipulá e kuadro pa RdK hasi e asina yamá ‘due diligence’ nesesario, miéntras ta duna Oryx Petroleum e posibilidat di hasi inspekshon tékniko i ‘due diligence’, entre otro pa medio di akseso na e dataroom di RdK. E MoU ta strukturá e negosashon pa yega na un potenshal akuerdo final.

Despues di RdK su petishon na kompanianan pa demonstrá nan interes na 26 di yüni 2023, RdK a risibí kontesta di 19 partido interesá, di kua 7 a keda inkluí riba un lista kòrtiku, skohé a base di RdK su petishon pa informashon adishonal. Oryx Petroleum a keda selektá for di e 7 partidonan aki.

Oryx Petroleum Group ta un kompania privá ku ta inkorporá na Hong Kong i ku tin plan di invertí den Latino Amerika i region. E kompania tin un eksperensha amplio riba tereno di atkisishon den e sektor di krudo i gas (upstream, midstream i downstream), meskos tambe den energia duradero. Banda di esaki, Oryx Petroleum ta un partisipante aktivo den tur merkado petrolero.  RdK, konforme e mandato di gobièrnu, ta keda komprometé na realisá progreso dirigí riba re-apertura di nos fasilidatnan petrolero na Kòrsou. RdK lo tene komunidat informá segun tin desaroyo den e proseso.

Tin sospecho ku eks miembro di parlamento i eks kolega den parlamento di Pik Pisas pa partido MFK, Dean Rozier por ta unu di e promotornan tras di Oryx. Rozier, manera menshoná no a reakshoná riba e pregunta spesífiko di Vigilante. Último tempu, Rozier tin bastante kontakto ku Refineria di Kòrsou. Tin indikashon ku Oryx Petroleum lo ta e kompania enkargá pa ehekutá e akuerdo entre PDVSA i Refineria Isla pa entrega di produkto na Kòrsou, inkluso e produktonan pa sirbi komo repago na penshonadonan na Refineria Isla PDVSA i kontratistanan. Segun Gobièrnu di Kòrsou, na Yüni próksimo e promé entreganan di produkto mester tuma lugá.