Everest: tènker Everest ainda  na Bullenbaai wardando pa saka e fuel oil for di Kòrsou.

Bullenbaai—E pago pa 490 mil bari di fuel oil, ta den proseso pa averiguá kumplimentu responsabel. Ta trata di un proseso normal di banko, pero den kaso di e fuel oil por tuma un tiki mas tempu, debí na problema pa legitimá e produkto. Ta trata di un produkto kontrabanda sin e lisensia nesesario

Manera ta konosí, ta trata di un suma di 28.6 mion pa e kompanianan Lapiz Lazuli i I&E Petroleum por bira doño di e kargamentu kontrabanda di 490 mil bari di fuel oil. Lapiz Lazuli ta un kompania internashonal den industria petrolero, miéntras I&E Petroleum ta formá pa komersiantenan lokal. Ku benta di e fuel oil, Refineria di Kòrsou/CRU ta risibí un suma di 9.2 mion dòler di hùr atrasá, okashoná pa CPR Holding ku a stòp di paga for di Febrüari 2023. Dùrwarder lo deskontá e hùr for di e suma di benta i depositá e sobra riba un kuenta intermediario te na momento hues apuntá ken tabata propietario di e fuel oil, kual te ainda tin duda ariba.

Den pasado e pagonan relashoná ku mesun fuel oil no a pasa “compliance di banko”. Bankonan korespondiente, tantu serka MCB Bank i tambe na Banco di Caribe tabatin preguntanan riba e transakshonnan relashoná ku entrega di 490 mil bari di fuel oil, kual kargamentu a yega for di Sèptèmber 2022 Kòrsou. Pa e bankonan na Kòrsou, hasi negoshi riba e 22 mion dòler balorá na fuel oil ta atraktivo, pero tin e riesgonan nesesario, relashoná ku orígen di e produkto petrolero. Esaki den kuadro di embargonan imponé pa Estádos Unídos riba PDVSA/Venezuela. Reglanan di kumplimentu bankario, a pone ku e.o. Banco di Caribe a manda un seri di pregunta na Refineria di Kòrsou den pasado. E preguntanan ta relashoná ku eksigenshanan den kumplimentu ku e banko internashonal Stern Bank a imponé, kual banko a mustra prekupashon, riba orígen i propietario di 490 mil bari di fuel oil den tankinan na Bullenbaai.

Tabata riba 3 di yüli 2023, ku Banco di Caribe a bati alarma pa mas informashon. Den un karta pa CFO na Refineria di Kòrsou, e banko lokal a manda puntra un seri di pregunta. Ta trata di preguntanan  riba Caribbean Petroleum Refinery, eks sosionan i kompanianan ku a partisipá den entrega di e fuel oil. E preguntanan a bini despues ku un seri di pago pa hür di Bullenbaai, no a traspasá riba kuentanan di Banco di Caribe, debí ku ta trata di un tópiko delikado. Tabata Hans Visssers, CFO na RdK kende a risibi e preguntanan. Lokual e banko tabata kier sa ta un seri di informashon.

Den e kaso aki, kisas lo ta mas fásil pa e pagonan pasa “compliance”. Debí ku e kompanianan ku kumpra e fuel oil no tin un relashoná dirèkt ku esnan kende a importá e fuel oil, ilegalmente.