Parlamentario pa partido KEM, Michelangelo Martines ta pidi pueblo stòp di laga RDK i gobièrnu kue nos kabes abou.

Willemstad,– Tur dia pueblo di Kòrsou ta skucha den medionan lokal i tambe riba retnan sosial tokante di Refineria pues ku si e ta habri bèk òf e no ta habri nunka mas.

Parlamentario pa partido KEM, Michelangelo Martines ta pidi pueblo stòp di laga RDK i Gobièrnu kue nos kabes abou. Segun Martines, nan tur dos sa bon bon ku Hulanda no ke pa e Refineria habri i ménos kaminda e ta situá aktualmente. E ta bisa ku mester kuminsá pone hende responsabel pa e echo aki paso no por ta posibel ku aworakí, nan mes atrobe ke pone Headhunting aselerá pa bolbe gasta miónes pa buska un partner, sabiendo ku na final e Refineria lo no habri tòg.

E parlamentario ta bisa ku e tipo di aktonan kriminal asin’aki Ministerio Públiko mester bula aden i kue tur esnan responsabel sera den SDKK.

“Na nos hermana isla Aruba, Gobièrnu a bai over pa na yüni 2023 aki trabounan di desmantelashon di nan refineria kuminsá, kual lo bai sòru pa míles di kuponan di trabou ku lo bai dura 3 aña i segun nan konteo e desmantelashon i benta di tur e materialnan aki lo bai hinka 300 mion florin den kaha di Gobièrnu arubiano” asina parlamentario Martines ta splika.

E ta puntra kiko Gobièrnu di Kòrsou ta warda riba dje, pa nos tambe bai over na desmantelashon di nos Refineria i stòp di gana e pueblo ku e refineria lo bai habri atrobe.