WILLEMSTAD,– Segun parlamentario pa partido KEM señor Michelangelo Martines su frakshon ta haña bon ku Gabinete Hulandes porfin ta rekonosé e ròl di Hulanda den inhustisia históriko kual ta sklabitut trans atlántiko i tambe rekonosé e konsekuensianan.

Ta un paso positivo pa dilanti ku nan ta komprometé pa inisiá un kaminda di konosementu, partisipashon i sanashon.
Martines ta splika ku Sinembargo, pa mehorá transparensia i komprenshon, ta bon si Gabinete Hulandes por brinda mas informashon tokante e manera ku nan a determiná e suma di 200 mion euro ku nan ke pone disponibel pa konsientisashon.

E ta splika ku basá riba kua rasonnan spesífiko i konsiderashon nan a yega na e montante aki, e ta kere lo yuda fomentá konfiansa públiko si nan por duna mas transparensia riba esaki.
Tambe e lider di KEM ta bisa ku lo ta bon pa nan duna un aklaratorio kon ta definí kuantu di esaki lo keda aloká pa kada pais den reino.
Tambe e ta bisa ku nan a menshoná ku esaki ta e kuminsamentu i no final di e proseso i e kier sa kon ta bai sigurá ku esaki no ta keda na palabra so i ku berdaderamente akshonnan pa yuda e desendientenan di sklabitut.
Aparte di tur esakinan Martines ta trese un mensahe pa su koleganan pa reflehá riba dje.

“E tópiko aki meskos ku hopi otro tópikonan ku nos ta atendé akiden ta pa drecha futuro di nos pais, pero esaki ta unu di sumo importansia paso e ta trata di nos identidat i mentalidat, i si nos ke realmente drecha e problemanan ku nos tin nos mester kuminsá ku sana nos mentalidat”, asina Martines ta duna di konosé. Bisando esaki e ta splika ku e ta haña hopi importante pa kada un di e parlamentario buska e informashon korekto serka profeshonalnan den e materia i no sin mas papia pa papia, paso loke ku disidí awor aki ta bai afektá futuro di pais.

“Mi ta hasta rekomendá pa miéntras e trayekto aki ta bai kuminsá pa nos risibí presentashonnan di nos profeshonalnan den e materia pa asina nos tur tin mas klaridat”, pues Michelangelo Martines parlamentario pa partido KEM.