Willemstad, — Den reunion di komishon sentral di e siman tras di lomba, a trata e kaso di salubridat públiko den kual a atendé finansa di CMC. Segun parlamentario Giselle Mc William di frakshon MAN, a menshoná ku tin un kantidat di sèn bastante grandi ku no a wòrdu prespuestá pa loke ta trata debe di CMC.

Giselle Mc William a enfatisá e importansia di nos CMC, i ku na momentu ku esaki no por duna e kuido adekuá ta nos tur ta sufri. Ta pa e motibu aki ta sumamente importante pa atendé ku e kaso di CMC na un manera korekto segun parlamentario Giselle Mc William. Parlamentario Giselle Mc William a indiká ku gobièrnu tin un debe di kual e tin ku atendé di CMC di 160 pa 170 mion florin.

Pa 2024 Giselle Mc William ta splika ku e debe anual lo ta 40 mion kual huntu ku debenan anterior lo trese un totalidat di 200 pa 210 mion di debe. Parlamentario Giselle Mc William ta puntra dikon no ta mira esaki presupuestá. Pero Giselle Mc William ta hopi furioso pasombra el a menshoná ku ta for di 2018 e rapòrt di KPMG ku ta bai tokante di ‘kostprijs en doelmatig onderzoek’ tabata konosí pa gobièrnu i minister di Finansa. Parlamentario Giselle Mc William a menshoná ku tur e lunanan a tende minister Javier Silvania di Finansa bisa ku no por hasi nada pasombra tin ku warda riba e rapòrt di KPMG i te ku dia 6 di novèmber último te ainda minister di finansa a menshoná ku e rapòrt no ta kla. Giselle Mc William a menshoná ku el a haña e rapòrt di KPMG ku ta bai tokante di ‘kostprijs en doelmatig onderzoek’.

Segun Giselle Mc Williami no ta pòrnada CMC tabata pidi pa subi nan presupuesto. E rapòrt di aña 2018 aki ta duna di konosé ku CMC su resultado ta keda atras dor di ingreso pronostiká for di SVB di prestashon di kuido i tambe kostonan operashonal lo ta mas haltu debí na entre otro kostonan di laboratorio ku a sali haltu. Segun e rapòrt, e resultado i cashflow di CMC ta duna di konosé di ta negativo i ku no tin sèn di reserva pa futuro i mantenshon di e hospital. Den esaki rapòrt di KPMG ta duna di konosé ku e situashon di CMC a empeorá i ku CMC no por kumpli ku nan obligashonan di debe. Segun Giselle Mc William ta splika Minister di Finansa tabata sa di e rapòrt aki i no a duna e bùdget korekto na CMC durante e añanan.

Den esaki Giselle Mc William ta menshoná ku mester a skucha gerensia di CMC i no pinta esaki pretu. Parlamentario Giselle Mc William a menshoná ku e situashon di CMC ta alarmante i ku ta un bèrgwensa total pa Kòrsou.