Miembronan di sindikato DOEN den Parlamento.

WILLEMSTAD – Komishon Fiho di Enseñansa, Siensia, Kultura i Deporte, a deliberá djaluna último ku sindikato di Dosente i no-Dosente pa un edukashon Nobo (DOEN), tokante e situashon di ‘klassenassistent’ i ‘onderwijsassistent’.

Riba e mesun fecha anochi, e sindikato a organisá un reunion general pa wak kiko ta hasi ku e reakshon di gobièrnu. STSK riba proposishon di DOEN tambe a partisipá na e reunion general.

E sindikato ta mustra riba diferente punto agudo. Ta trata akí di puntonan manera entre otro, 27 ora di lès pa VSBO, ora no sufisiente, fakansi i ora di trabou di personal di sosten (no-dosente). “Ta puntonan ku pa añanan largu ta riba mesa sin ku por tuma un desishon pa kaba.”

For di febrüari dje aña akí ta sintando ku Ministerio di Enseñansa di forma struktural, den un asina yamá reunion di trabou pa trata posishon hurídiko den enseñansa. Den un reunion di ‘follow up’ despues di a sinta ku Minister Sithree van Heydoorn na aprel, a keda di trata e pregunta klave: Kiko ta bai pasa ku e 20 i piku otro funshonnan ku no a haña promoshon despues ku na mart último únikamente 2 di e 23 funshonnan den Enseñansa a haña promoshon? DOEN su proposishon pa ‘Ban Komplementá’, ta kla pa Minister risibí un presentashon.