Schottegatweg Noord,– Ayera den oranan di mainta sindikato DOEN a organisá nan própio dia mundial di dosente. Riba 5 di òktober, tur pais na mundu ta duna rekonosementu formal na e trabounan duru ku dosentenan ta ehersé tur dia di nobo. Sindikato DOEN a organisá e evento den edifisio di PWFC.

Despues di a splika e importansha di trabounan di dosente, presidente di sindikato DOEN a entregá un manifesto na diferente ofisial públiko ku ta ehersé trabounan importante. Ta asina ku Promé Minister “Pik” Pisas, presidente di parlamento Charetti America, presidente di komishon fiho di enseñansa Gilbert “Gibi” Doran i diferente direktiva di skol a risibí e deklarashon públiko di sindikato DOEN.

E manifesto públiko ta deklará ku mester hasi enseñansa aki na Kòrsou un prioridat! E manifesto ta splika lo siguiente:

Konsiderando e echo ku opviamente enseñansa den nos país no ta hañando e atenshon debido i pues no ta prioridat den nos pais; Sindikato DOEN riba 5 di óktober; ‘Dia Internashonal di Maestro’ ta pone na atenshon di mundu internashonal i outoridatnan lokal e puntonan ku na nos konsepto mester kumpli kuné pa por konsiderá ku por fin enseñansa a bira prioridat na Kórsou. Tanten ku no kumpli ku e puntonan akí por konta ku en todo kaso komo organisashon representante di trahadónan den enseñansa, Sindikato DOEN lo sigui eksponé esakinan i kaminda ta nesesario ahustá e forma di eksponé esakinan.

Enseñansa ta prioridat na momentu ku kumpli ku e siguiente puntonan:

1. Mester tin un maneho di enseñansa abase di vishon unda nos ke bai i unda nos ta mira Kórsou aki 20 pa 30 aña.
2.  Invertí, esta amplia presupuesto di enseñansa, pa karga e maneho ariba menshoná i perkurá di e forma aki pa un enseñansa di kalidat ku ta kumpli ku nesesidat di tur mucha sin importá e gremio sosial ku e ta prosedente di dje.
3. Hamas kòrta den presupuesto di enseñansa.
4. Presentá 1 di desèmber, riba dia di enseñansa un plan di mas aña pa pone den tur lokal èrko i/o sistemanan ku por perkurá, prinsipalmente den durante temporada di kalor ekstremo, pa un ambiente agradabel i saludabel, ekológikamente responsabel,
5. Adaptá V&V-stelsel den su totalidat o bini ku un sistema kompletamente nobo garantisando ku loke ta presupuestá pa enseñansa ta bai na e lugá korekto, ta basá riba e realidat finansiero aktual i ku ta kumpli ku e nesesidat i realidat pedagógiko ku nos enseñansa ta konfrontá
6. Duna tur personal den enseñansa e rekonosementu i trato meresé, tantu dosente, personal di sosten i apoyo i personal atministrativo
7.  Duna mayor e lugá korespondiente; komo un di e tres pianan di e krük ku yama enseñansa
8. Rekonosé loke debe trahadó den enseñansa for di 2005 bin ariba i pone den un presupuesto di mas aña kon ta paga esaki.
9. Duna trahadó den enseñansa partisipashon debido atraves di nan representantenan den tur Ioke ta regardá maneho di enseñansa respetando i bibando e “dubbele feedback akkoord” ku trahadónan den enseñansa a wèlga 21 dia largu p’é na aña 1975
10. Krea un plataforma konsistiendo di tur stakeholder; i ku un struktura ku ta yuda karga i sostené maneho di forma debido.

E manifesto ta sigui splika ku; Tur ariba menshoná lo bin dilanti di un o otro forma den e petitie online ku nos a lansa awe ofisialmente. Ku esaki, na nòmber di famia di enseñansa; esta trahadó den enseñansa, mayor, alumno i studiante manifestante, Sindikato DOEN ta entregá awe riba 5 di òktober 2023 Dia Internashonal di Maestro na presidente di Staten, na Promé minister, na minister di enseñansa, na presidente di komishon fiho di enseñansa i na direktivanan di skol e manifiesto akí!

Ku entrega di e manifiesto akí nos a dal e promé stap pa hasi enseñansa prioridat. Un i tur ku di un o otro forma a tuma akshon awe 5 di òktober 2023; Dia Internashonal di Maestro, pa medio di entrega di e manifiesto akí ta sirbí!

E manifesto a keda firmá tantu dor di presidente di sindikato DOEN Marbella Felipa komo vise-presidente Jurine Nieddu.