WILLEMSTAD – Komishonnan fiho di Desaroyo Sosial, Trabou i Bienestar (SOAW) i Komishon di Enseñansa, Siensia, Kultura i Deporte (OWCS), a reuní ku direktiva dje fundashon ku ta bringa pa protekshon di mucha, Stichting Kinderbescherming Curaçao (SKBC) djamars último.

Durante e reunion, direktiva di Stichting Kinderbescherming, ku Diahanne Lichtenberg na kabes, a duna un presentashon relashoná ku situashon di e fundashon. Despues dje presentashon miembronan di e dos komishonnan a hasi pregunta i deliberá ku e direktiva di SKBC.

Lichtenberg mes ta esun ku a manda un karta ku e petishon pa sinta ku miembronan di Parlamento. Den su karta el a enfatisá ku interesnan sosial ta na peliger dor dje menasa di kontinuashon dje eksistensia di SKBC. Su petishon tabata pa papia tokante asuntunan ku ta pone e kontinuashon dje fundashon na peliger. E organisashon, ku ta hunga un ròl esensial den sirbi interesnan sosial di Kòrsou pa mas di 70 aña, ta enfatisá e seriedat di e situashon i ta pidi pa tuma akshon promé ku ta lat.

Den e karta e presidente a remarká e nesesidat di un reunion privá ku e miembronan di e komishon pa diskutí un kantidat di asuntunan krítiko ku ta pone kontinuashon dje fundashon na peliger. E asuntunan akí tin konsekuensianan direkto pa e papel krusial ku e fundashon ta hunga den protegé muchanan i sirbi komunidat di Kòrsou. E importansia di e reunion akí ta suprayá p’e echo ku SKBC ta hunga un papel vital den garantisá seguridat i bienestar di muchanan. E kontinuashon di su servisio ta di vital importansia pa stabilidat sosial i komunidat di Kòrsou. E fundashon a hasi un petishon urgente na e miembronan di e komishon pa agendá e reunion pa 22 di mart prósimo, pero esaki a tuma lugá djamars último pues.