WILLEMSTAD – Kontraloria General ta rekomendá Parlamento den su rapòrt mas resien tokante supervishon efektivo di Enseñansa obligatorio, pa pidi Minister di Enseñansa, Siensia, Kultura i Deporte (OWCS) kuenta tokante e defisiensianan. Kontrolaria General a mustra riba e echo ku 6 aña despues ku Kontraloria a hasi su rekomendashonnan, ainda gobièrnu no a solushoná e defisiensianan konstatá òf tin solushon parsial so.

For di e akshonnan ku e Minister a presentá den su reakshon ku OWCS ta trahando riba dje ta sali na kla ku entre otro e siguiente akshonnan ta planiá pa e mitar aña di 2023. Ta trata akí di e implementashon di CLOA, esta e aplikashon sentral di enseñansa nashonal, i terminá e prosesonan relevante. Ademas lo traha riba e adaptashon di e lei di enseñansa i e desishonnan ministerial korespondiente, e nota di maneho i e protokòl di apsentismo. Tambe lo traha riba e finalisashon di e boletin di informashon i e komunikashon di e kambionan na e esnan konserní.

“Pa por realisá e plan aki e Minister mester sòru pa traha un plan basá riba e prinsipio SMART pa por finalisá e akshonnan aki. Banda di e medidanan ku OWCS ta trahando riba dje, e Minister mester wak si esakinan ta korespondé ku e medidanan menshoná den e rapòrt òf ku a base di esei lo mester tuma otro medidanan. Mester añadí e medidanan adishonal aki tambe na e plan menshoná. Kontraloria ta konsehá Parlamento pa eksigí di e Minister pa basá riba e planifikashon riba e prinsipio SMART akí, indiká pa ki dia lo solushoná e defisiensianan kompletamente.”

E Minister Sithree van Heydoorn den su reakshon di luna pasá, a indiká kua ta e akshonnan ku OWCS ta trahando riba dje pa eliminá e defisiensianan. Kontrolaria General a inkluí un anekso ku tur e akshonnan akí menshoná. “For di e informashonnan risibí di e Minister tokante e akshonnan tumá òf esnan ku nan ta trahando riba dje, ta indiká ku e akshonnan akí, ainda no a kondusí na un resultado mas favorabel. Debí ku ya tin mas ku seis aña ku Kontraloria a presentá su rekomendashonnan i esakinan no a wòrdu implementá kompletamente, Kontraloria ta konkluí ku no a tuma medidanan ku e rapides nesesario pa asina yega na un kontrol efektivo. Miéntras e defisiensianan no wòrdu solushoná òf parsialmente solushoná, no ta wòrdu kumpli kompletamente ku e lei di enseñansa obligatorio.”