Punda—Ayera den un moshon sosten’é, Parlamento di Kòrsou a ordená minister di Salubridat Públiko Dorothy Janga pa hala su karta aden. Esaki a sosodé despues ku Parlamento a trata e tópiko den un reunion públiko.

E minister ayera a splika ku e no tabatin mal intenshon tras di e karta sino tabata kier a atende un problema bou di su kartera. E deklarashon di Janga a bai asina leu ku e la aseptá di e haña “sota”, referiendo na e tantísimo krítika risibi. Pero ayera e minister a risibi mas “sota” ainda serka parlamento. Den un moshon ku a práktikamente a kita tur dignidat polítiko, Parlamento a splika e minister pa den futuro raporta tur desishon ku tin impakto riba nos pais. Mas aleu Parlamento a desaprobá kompletamente e aktitut di e minister i pa revisá su kartera i konseheronan. Al final Parlamento a urgi pa e minister hasi su máksimo esfuerso pa hala e karta bek aden.