Willemstad- Partido Nashonal a tuma nota di un karta ku algun èks-empleado di CBA Television a trese den publisidat, despues di a manda esaki pa formadó.  Sali for di su prinsipionan kristian demókrata, Partido Nashonal por sinti i ta kombibí ku kualke suidadano ku sinti ku a kometé inhustisia kontra di dje.  Den e kaso spesifiko aki sinembargo, por tuma nota ku e klamor aki (i ela keda ekspresa tambe pa e vosero di e grupo) ta un intento deliberá pa stroba un posibel postulashon di sr. Ramon Chong komo Minister enkargá ku desaroyo ekonómiko, sin ningun base.  Todo lo kontrario. Sr. Chong, pa su kontribushon pa purba salba un kompania ku tabata den problema serio kaba ora ela yega, awor opviamente mester bira viktima di un situashon ku e mes a sakrifiká hopi pa purba salba, pero ku a resulta embano. 

Ta p’esei Partido Nashonal, meskos, ku tur e otro instanshanan ku e grupo a aserká, debídamente ta kombibí ku i ta para pa atendé ku sirkunstanshanan ku empleadonan sa haña nan aden ora un empresa sera su porta inesperadamente, pero ta rechasá e intento dirigí pa tacha un posibel postulashon di Sr. Chong.  Pa Partido Nashonal Sr. Chong definitívamente ta keda un bon posibel kantidato pa ta un próksimo Minister di Desaroyo Ekonomia, netamente basá riba su konosementu i kapasidat ya demonstrá den pasado pa djump start nos ekonomia ku aworaki ta mal stanká. No lubidá kon e la kambia un desaroyo ekonomiko i di turismo negativo den unu positivo den aña 2001.

Durante di e último dianan por tuma nota ku tin varios intento dirigí pa frustra sea formashon di e siguiente gobernashon of tacha posibel kantidatonan.  Mester lamentá esaki.  Kòrsou na e momentu aki mester di  su mihó mentenan pa  konsentrá riba kon saka nos pueblo for di e chukumpe ku nos ta aden.  E situashon no ta fasil.  Partido Nashonal kuntu ku MFK a komprometé nan mes pa goberná nos pais ku konvikshon, firmesa i konfiansa ku nos ta logra saka nos pueblo for di e situashon aki.  Partido Nashonal pa e rason aki a proponé na Formado, kantidatonan pa bira Minister ku di bèrdat por i tin e kurason na lugá i e kapasidat  nesesario pa hasi e trabou aki.  Lamentablemente tin forsanan ku ke hasi tur esfuerso pa frustra e esfuerso aki. Sea informa ku sr. Chong debídamente a suministrá formador tur echonan den e kaso di CBA.

Partido Nashonal pa loke a pasa na CBA i e ròl di Sr. Chong ke ta korto.  Akshonistanan di CBA a aserká Sr. Chong pa yuda guia e planta komo konsehero pa hinké riba kaminda pa rekuperashon, konsiderando su amplio konosementu komersial ekonómiko i su netwerk.  Nos ke enfoká ku sr. Chong no tabata ni propietario ni direktor di e kompania en kestion. Hustamente hasiendo uso di su kapasidat e por a logra tur e kontratonan pa por a mantené e empresa den operashon. Den esaki Sr. Chong a hasta sakrifiká di su banda, pa salba e kompania  mas aun e kuponan di trabou.  Lamentablemente e situashon ku e kompania ya tabata aden, huntu ku un produkshon pober den e kompania i un merkado kompetitivo a pone ku, no opstante tur esfuerso i palabrashon, e kompania mester a sera inesperadamente.

Ta di lamentá ku ta akusé awor di no a paga impuesto ni regla sesantia. Tin ku trese dilanti ku den e firmantenan ta tin hende ku tabata sa ku tur kos tabata  reglá i a haña e konfirmashon di SVB ku for di juni aña pasa a risibi e petishon i a entrega tur dokumento  korespondiente . Si pa motibu di Covid-19 o kualke otro motibu no a paga e Sesantia na e trahadonan, tampoko no por buk esaki riba sr. Chong.

Tambe mester trese dilanti ku, si un kompania stòp di operá pa kualkier motibu, ta difísil pa move e responsabilidat di sigui kumpli ku obligashonnan personal riba un hende o e kompania en kestion.

Finalmente, Partido Nashonal ta informá- ku pa un kandidato pasa screening, tur su asuntonan fiskal I su rèkortnan hudisial mester ta na órdu. Ta di lamentá ku despues di dos aña  un grupo di èks-trahadó di CBA ta asumí e responsabilidat pa husga, sin lei den nan man, i asina tacha e proseso dor di purba asesiná karakter di un kandidato, pa kualkier motibu personal o no konosí.

— Fin Komunikado —