WILLEMSTAD – Tres trahadó di Analytisch Diagnostisch Centrum NV (ADC) nasé na aña 1959 ku a baha tempran ku penshon entrante 1 di yüni último, tin derecho riba pago dirèkt dje lùmpsùm palabrá ku e kompania, pero no riba e gratifikashon di penshon stipulá den e kontrakt laboral kolektivo (CAO). Asina Korte a disidí djaluna último.

Den e huisio sumario akí a sali na kla ku ADC a ofresé trahadónan mayor di edat e oportunidat pa stòp di traha delantá, basá riba un areglo ku ta parse e asina yamá  ‘Landsverordening Vervroegd Vrijwillige Uitstroom’ (Lei di VVU). E tres trahadónan den e kaso akí, a aseptá e oferta akí i a bai di akuerdo ku un solo pago 45 mil florin bruto pa persona. Sinembargo, ADC a anunsiá di lo paga e suma akí den tres término. Segun e trahadónan esaki no ta kuadra. Nan a eksigí pago di e suma akordá den un tiru i tambe un gratifikashon di penshon konforme e CAO.

E punto fundamental dje disputa entre e partidonan ta drai rondó dje interpretashon di e akuerdo di pago i e aplikashon dje CAO. Korte a splika e konteksto legal na promé lugá, referiendo na e Lei di VVU i e relevansia dje CAO. Korte ta mustra riba e echo ku mester paga e lùmpsùm konforme e Lei di VVU den un tiru despues ku terminá e relashon di trabou. Korte ta remarká ku ADC no por desviá for di e akuerdo akí sin aprobashon dje trahadónan akí. Korte a rechasá e argumento ku ADC a diskutí e posibilidat di pago den término ku sindikato ABVO, pasó esaki no ta mara e èks trahadónan mes na nada ni tampoko ta konstituí un akuerdo konkreto ku nan.

Korte a konkluí ku èks trahadónan tin derecho riba e pago dje lùmpsùm akordá den un tiru, manera ta stipulá den e Lei di VVU. Korte no ta konsiderá e argumento di ADC ku nan preferensia tabata pa pagonan den término relevante, i Korte ta enfatisá ku e èks trahadonan no tabata obligá pa antisipá e preferensia akí.

Pa loke ta trata e gratifikashon di penshon, Korte ta konkluí ku e no ta aplikabel riba e areglo di stòp di traha delantá ku e èks trahadónan a skohe p’e. Ta mira e areglo akí komo un alternativa pa penshon, i p’esei mes e gratifikashon di penshon no ta aplikabel. Na final, Korte a diskutí e gastunan di e proseso di huisio sumario i a kondená ADC pa paga e suma ku e èks trahadónan a gasta, aumentá ku e interes legal. ADC mester paga tur otro gastu di e proseso tambe.