WILLEMSTAD – Aktualmente Haiti a yama un situashon di emergensia nashonal komo konsekuensha di violensha persistente entre gèngnan den e pais. A introdusí un toke de keda na Port-au-Prince i áreanan den besindario.

Kòrsou ta vigilá e situashon na Haiti i komo parti di Reino Hulandes, ta den kontakto ku Embahada di Reino na Repúblika Dominikana i tambe e servisionan relevante di e Ministerio di Asuntunan Eksterior.
Reino no tin un embahada na Haiti, pero un Kònsùl Honorario na Port-au-Prince.

E konseho di biahe (https://www.nederlandwereldwijd.nl/reisadvies/haiti) ta pa no biaha pa Haiti. Bandoná Haiti si esaki por di un manera ‘safe’.

A hasi un yamada na tur residentenan di Kòrsou i Hulandesnan ku aktualmente ta na Haiti pa nan mèldu via di e servisio di informashon di e Ministerio di Asuntunan Eksterior (https://informatieservice.nederlandwereldwijd.nl/). Esaki ta konta tambe pa personanan ku tin un pèrmit di estadia bálido pa Kòrsou.

Si bo tin konosementu di residentenan ku aktualmente ta na Haiti, por fabor pidi nan pa registrá via di e servisio di informashon di Ministerio di Asuntunan Eksterior i via mail na: [email protected] di e Direktorado di Asuntunan Eksterior di Gobièrnu di Kòrsou (DBB). Mester indiká nòmber(nan) i fam, number di telefòn i adrès na Kòrsou i na Haiti.

Di e forma akí e Ministerio di Asuntunan Eksterior i Direktorado di Asuntunan Eksterior por tene nan informá di desaroyonan i duna konseho, manera por ehèmpel si presentá posibilidatnan pa bandoná e pais.