WILLEMSTAD – Durante e Konsulta Atministrativo di Kuater Paisnan na Sint Maarten, a disidí ku lo instalá un komishon di Reino, ku e tarea di organisá e próksimo Konferensia di Reino. Tambe a disidí ku un tim tékniko lo hasi un presentashon tokante e aspektonan importante den preparashon pa e Konferensia di Reino. E tim tékniko ya ta den fase final esaki.

E presentashon lo ta aprobá den término kòriku durante un reunion atministrativo. Asina Minister-Presidente i ademas Minister di Asuntunan General Gilmar ‘Pik’ Pisas a splika Parlamento e siman akí, por eskrito pa medio di Presidente Charetti America-Francisca.

Ta e intenshon pa ora ku instalá e komishon enkargá ku e preparashon sustantivo di e Konferensia di Reino, e komishon kuminsá traha mesora. “Despues e komité lo hasi un rekomendashon na e Promé Ministernan di e tres paisnan (redakshon: Pisas, Evelyn Wever-Croes di Aruba i Silveria Jacobs di Sint Maarten) i tambe e Sekretario di Estado di Asuntunan Interno i Relashonnan di Reino di Hulanda Alexandra van Huffelen, despues di konsultá ku e Parlamentonan di Reino, pa loke ta trata e forma den kua e Parlamentonan lo partisipá den e preparashon di e Konferensia di Reino. Porlotantu na un momentu durante di e proseso preparatorio, e komishon lo konsultá ku e Parlamentonan tokante nan papel den elaborashon di e agènda pa e Konferensia di Reino.”

Manera Vigilante a informá na òktober aña pasá, Van Huffelen a splika Tweede Kamer ku mester diskutí Konferensia di Reino tokante Statüt ainda ku gobièrnu. Mester diskutí e moshon Wuite i Van Raan ku gobièrnu di Kòrsou ainda. E mester papia ku Sint Maarten i Aruba tambe ainda. E moshon ta trata un Konferensia di Reino na 2023 ku temanan manera Statüt, ‘Unierecht’ (derecho di Union Europeo) den relashon ku Reino, derecho humano, kambio di klima, fortalesimentu di ekonomia i kolaborashon regional/internashonal.

E miembronan di Tweede Kamer Jorien Wuite di D66 i Lammert van Laan di PvdA a entregá e moshon di 7 di yüli aña pasá durante tratamentu di entre otro e fondonan pa islanan BES di 2021. Konforme e moshon, gobièrnu Hulandes mester papia ku islanan den Karibe pa organisá un konferensia di Reino ku e temanan Statüt, Lei di Union Oropeo den relashon ku Reino, derechonan humano, kambio di klima, refuerso ekonómiko i koperashon regional/internashonal.

E gobièrnu Hulandes ke eliminá e défisit demokrátiko tambe den e proseso di Tweede Kamer pa tuma desishonnan tokante proposishonnan di leinan di Reino, dunando espasio na paisnan den Karibe pa tin un voto proporshonal. Anteriormente Van Huffelen a splika kaba ku: “Ainda mester elaborá riba e deseo aki, i pa mi parti esaki por forma parti dje diálogo tokante koperashon i relashonnan den Reino. Un grupo di trabou ofisial a traha un plan di akshon pa yega na un vishon pa ku e responsabilidatnan denter di Reino. Ademas, ku e moshon di Wuite i Van Raan, Tweede Kamer a pidi gabinete pa inisiá konsultanan ku e islanan den Karibe, pa organisá un konferensha di Reino na 2023.”

Segun e Sekretario di Estado ta konsiderá deseabel pa reuní periódikamente pa por formulá un vishon riba término largu di Reino i paso esaki por kontribuí na komprenshon mutuo, fortalesé e eksperensia demokrátiko i di e estado di derecho, i e koperashon mutuo. “Lo mi ke diskutí mas profundo riba esaki durante e próksimo reunion di hunta.” De e karta mas resien di aña pasá Van Huffelen a reafirmá: “Lo mi papia tokante e moshon aki ku e gobièrnunan di Aruba, Kòrsou i Sint Maarten, durante e siguiente reunion ku ainda mester plania. Lo mi informá boso di Tweede Kamer mas tantu tokante di e ehekushon di e moshon aki na fin di e aña aki.”