Wishi na unda e tiramentu a tuma lugá.
Willemstad, — Ayera mainta e agente polisial Dap a presentá den korte akusá di maltrato pisa i òf subsidiariamente intento di maltrato pisa ku a tuma lugá dia 18 di desèmber 2021 unda e lo mester a los bala riba un sospechoso ku a alkanse na vários parti di su kurpa.
E agente polisial Dap ta wòrdu akusá ku riba dia 18 di desèmber 2021 intenshonalmente e lo mester a okashoná leshonnan pisa na e persona N. Dorothea kual ta heridanan di bala na man drechi, skouder robes, brasa robes i bèl di pia robes. Esaki a wòrdu okashoná dor di los tirunan dirigí hasiendo uso di un arma reglamentario riba e parti ariba i òf abou di e kurpa di e hòmber Dorothea. Dia di e suseso e komunikado Polisial a bisa lo siguiente: Tabata djasabra mardugá 18 di desèmber 2021 ku Polis a haña e informashon ku tin un grupo di hòmber tratando di bai ku un vehíkulo ku tabata stashoná den e bario di Wishi den banda di e edifisio di Marchena Hardware. Un tim di polis a kordiná e akshon i a bai ku lus paga den e bario pa trata di interseptá e ladronnan aki.
Na yegada enbèrdat a bin topa ku un grupo di hòmber kual na momento di a mira e vehíkulonan Polisial a kuminsá kore. Polis mesora a sali nan tras i mester a hasi uso di arma reglamentario na unda primeramente a los tirunan di atvertensia sigui pa tirunan dirigí ku a alkansá un di e sospechosonan na tres parti di su kurpa. Mesora a pidi presensia di ambulans i a sigui ku búskeda di e sobra sospechosonan. Na final a logra di detené tres hòmber sospecha di tabata hasi e trámitenan pa hòrta un vehíkulo. E sospechoso herida mesora a keda transportá pa CMC na unda e la wòrdu interná. E tres sospechosonan a keda transportá pa warda miéntras na e sitio a konfiská un vehíkulo. E kaso ta den investigashon. Ayera Hues a sali splika ku e kaso lo wòrdu trata Pro Forma debí ku abogado di e akusado Dap kual ta señora Vaders a hasi algun petishon di investigashon ku e kier pa tuma lugá den e kaso di su kliente.