Willemstad, — For di investigashon realisá pa landsreshershe Kòrsou a bin resultá ku no tin sufisiente prueba ku e agente polisial ku a tira un persona a kometé echonan kastigabel.

 Dia 11 di desèmber tabata un insidente di tiramentu na Kaya Timicuan i ku Sr. S.L. a keda heridá dor di uso di un arma reglamentario di un agente polisial. Riba órden di Ministerio Públiko Landsrecherche Kòrsou a kuminsá un investigashon di e tiroteo aki. For di e investigashon a resultá ku no tin sufisiente prueba ku e agente polisial a hasi su mes kulpabel na un echo kastigabel. Esaki ta nifiká ku e investigashon lo keda seponé i e agente polisial lo no keda persiguí penalmente. Ministerio Públiko a tuma e desishon aki despues di konsiderá tur echo i sirkunstansianan disponibel di un manera kuidadoso. Ministerio Públiko ta para pa un Kòrsou seif i hustu. Kuerpo polisial ta hunga un ròl importante den mantenshon di órden públiko i seguridat di e isla i su habitantenan. Pa e motibu aki, Ministerio Públiko ta husga aktuashon di agentenan polisial semper ku hopi koutela, sigur ora ta hasi uso di monopolio di violensia. Landsrecherche ta un órgano investigativo independiente ku un tarea speshal. E ta orientá su mes riba persekushon di delitonan kometé dor di funshonarionan (semi)gubernamental. Landsrecherche ta aktua prinsipalmente den e ámbito di kondukta kastigabel ku gravemente ta afektá e integridat di e atministrashon di hustisia i e integridat di e atministrashon públiko.