Hefe di prosesonan interno di KPC, sr. Elbert Sambo a bisa ku polisnan ta bon prepará pa marchanan di karnaval.

Willemstad, — Ayera durante e rueda di prensa di gobièrnu, Hefe di prosesonan interno di KPC, sr. Elbert Sambo a duna informashon kon polis a bin ta prepará su mes pa e aktividat di karnaval.

Sr. Sambo a splika ku polis tin un struktura spesifiko ta atendé eventonan di eskala grandi ku nan ta yama SGBO internamente, esei pa motibu ku tipo evenementonan aki ta eksiguí un aserkamentu multidisiplinario internamente i komo tal polis a bin ta organisá e struktura pa algun luna kaba. 

Aktividatnan ku ya a tuma lugá kaba, segun sr. Sambo ta ku kuerpo a sinta na mesa ku diferente di e “stakeholdersnan” ku tin di haber ku karnaval i ya kaba tin sierto kosnan konkreto ku a tuma lugá manera kòntròl di vehíkulonan etc. Tambe sr. Sambo a splika ku nan a sinta tambe ku e organisadó di Karnaval ku ta FDKK, antó ápesar ku nan ta sinta ku e otro “stakeholdernan”, nan enfásis pa ku FDKK ta ku nan ta e organisashon ku tin e pèrmit. Antó den e kuadro ei, nan ta responsabel tambe pa tur loke tin di haber ku organisashon di karnaval, kontakto ke gruponan, orarionan ku e pèrmit ta stipulá ki ora marcha ta sali i ki ora marcha mester ta aden, pues pesei segun sr. Sambo, nan komunikashon ku FDKK ta hopi importante ya asina nan ta “take care” di karnaval i nan komo polis ta konsentrá nan mes riba e parti di órden públiko i tambe e parti di “aktua robes, sinti’é un bes”.