AMSTERDAM—Prominentenan politiko di diferente pais i nan famianan tabata envolví den último añanan den transakshonnan dudoso di kasi 14 miar euro.

Ta trata di entre otro yu muhé di presidente angoles ku a transferí 52 mion euro di forma ilegal via un kompania na Amsterdam. E estudio di e yu muhé di un politiko di Moldavia na Maastricht a keda pagá via un kuenta bankario na islanan Virgen. Tur esaki segun un investigashon di sentro kontra labamentu di plaka Anti Money Laundering Centre (AMLC) riba politikonan prominente. Den AMLC ta traha entre otro polis, Ministerio Públiko, servisio di investigashon fiskal FIOD, bankonan i kantornan di accountant. Ta trata di hefenan di estado, parlamentarionan, huesnan of direktornan di kompanianan di estado.

Tin ekstra supervishon riba transakshonnan di e grupo aki i nan famia pasobra nan ta vulnerabel pa soborno i korupshon. Institutonan finansiero mester keda obligá pa mèldu transakshonnan remarkabel di nan klientenan. Meskos ta konta pa personal di benta di kas, casino i kompanianan krypto. E melding ta bini di e unidat di inteligensia finansiero FIU, un instituto di gobiernu ku ta investiga posibel indikashonnan di labamentu di plaka òf finansiamentu di terorismo. Si e indikashonnan tei, FIU ta duna e transakshon e stempel di dudoso. E transakshonnan sospechoso ta keda kompartí ku servisionan di investigashon manera FIOD i inteligensia. Huntu ku OM ta evalua ku tin sufisiente prueba pa persekushon. Alrededor di 100 prominente tabata envolví den 14 miar euro ku a keda di stempel komo sospechoso entre 2011 pa 2023. Algun di e prominentenan tin nashonalidat hulandes, pero mayoria ta ekstranhero, algun di nan riba lista di sanshon. Riba e lista tin hopi paisnan ku tin reputashon di paraiso fiskal manera Cyprus, Suisa, Luxemburg, emiratonan arabe, Monaco, islanan Virgen i Singapore. Tambe tin paisnan manera Letland, transakshonnan dudoso di Hulanda pa Portugal, Surinam i Inglatera, Ghana, Fransia, Angola.