WILLEMSTAD, — Segun Quincy Girigorie 800 mion ku minister di finansa a laga bai, por a yuda solushoná mas ku dos tersera parti di e problemátika di Ennia.

Parlamentario Amerigo Thode di frakshon MFK a menshoná ku ta reklamá ku minister di finansa ta biba riba Facebook, pero mester wak tur lokual ta hasi ku sènnan ku ta kobra i ta invertí bèk den komunidat. Segun Amerigo Thode mester sostené e gobièrnu di ministerio di finansa. Parlamentario Quincy Girigorie di frakshon PAR, a menshoná ku den kuadro di e sènnan ku ta kobra, ta ki tipo di kobransa ta papiando di dje.

Quincy Girigorie di frakshon PAR a menshoná ku e ta kòrdá sentensia di 3 ougùstùs 2023 den kual hues a mustra ku minister di finansa a regalá mas ku 800 mion florin di debenan di impuesto di hendenan ku tabatin sèn poné un banda, institutonan bankario, hendenan ku a pasa sèn riba kuentanan bankario di notario, hendenan ku tabatin investigashon penal pa evadí impuesto i pa krímennan di impuesto.

Quincy Girigorie di frakshon PAR ta menshoná ku ta papia di kuenta di kobramentu di sèn riba kaya kaminda minister di finansa a laga sèn di belasting keda den saku di hendenan ku tin plaka i institutonan bankario. Tambe parlamentario Quincy Girigorie a agregá ku si a kobra e sèn aki, nos no lo ta sinta ku e problemátika di Ennia. Segun Quincy Girigorie a bisa ku e 800 mion ei por a yuda solushoná mas ku dos tersera parti di e problemátika di Ennia.

Herensia di gabinete anterior?

Juniel Carolina di frakshon MKF, a indiká ku e minister di finansa a heredá e problemanan ku e gabinete nobo a bini kuné i ku e minister di finansa a sa di kobra e sèn riba kaya, pa asina inverti’é bèk den kaha di gobièrnu. Parlamentario Juniel Carolina a bisa ku minister di finansa lo sigui hasi esaki pa asina yuda komunidat unda tin mester.