Otrobanda— Ta pronostikando ku por lo ménos 40 spesialista, sino mas, lo bandoná CMC pa Yüni 2024. Esaki relashoná ku introdukshon di e Lei Plafon Salarial, kual na 2025 ta bira aplikabel pa spesialistanan bou di kontrakt na CMC. Ta trata di un grupo di spesialista, kual e aplikashon lo drenta na vigor pa nan entrante 2025.

Eks miembro di direktiva asosashon di spesialistanan, Vito Koeyers ta prekupá. Sin kier a bai muchu den detaye, Koeyers a konfirmá ku tin un prekupashon serio den nan seno kiko ta bai pasa na 2024. Informashonnan verídiko ku Vigilante ta disponé ta indiká ku por lo ménos 40 spesialista den CMC ta hasiendo trámitenan pa emigrá ku nan famia pa un otro pais. Esaki lo sosodé, entre mart pa yüni 2024, pa asina nan yunan por inisiá skol den un otro pais durante e aña eskolar korespondiente. E spesialistanan tei ainda, pasobra pa mayoria den e plafon salarial e aplikashon lo tuma lugá na 2025.

Pa evitá e efektonan riba nan entrada, ya e spesialistanan a kuminsá hasi nan trámitenan personal pa sali for di Kòrsou promé e areglo di plafon drenta na vigor. Manera ta konosí, un kantidat di spesialista na Curaçao Medical Center a manda mensahe bon kla pa gerensia di ta pensando na baha. E insertidumbre ku tin rònt di e lei yamá Landsverordening normering topinkomens (LNT) pa personal tòp den Curaçao Medical Center (CMC) ku tin na vigor for di desèmber aña pasá, ta sigui okashoná problema pa funshonamentu di e hòspital. Pero lei ta aplikabel pa algun spesialista miéntras lo drenta na vigor pa demas na 2025.

Direktiva di CMC den un karta dirigí na gobièrnu (lesa Minister interino di Salubridat (GMN) i di Finansa, Javier Silvania) na kuminsamentu di Mei, den kua ta mustra riba e konsekuensianan negativo. Den kartanan di 13 di febrüari i tambe 14 di aprel e asosiashon di spesialista tambe a pidi atenshon di gobièrnu pa e konsekuensianan negativo di aplikashon di LNT riba e spesialistanan den servisio di CMC i a insistí riba un solushon riba término kòrtiku.

Konforme un amienda ku Parlamento a laga inkorporá den e lei, despues di tres aña lo kuminsá baha salarionan di funshonarionan i konseheronan den tòp di sektor públiko òf semi públiko, ku ta surpasá e stándar manera stipulá den e LNT. T’asina ku CMC a manda un karta dia 7 di febrüari den kua a mustra kaba riba e preokupashonnan grandi tokante e impakto ku e LNT por tin riba e grupo di spesialista médiko den servisio di CMC, i pa loke ta trata garantia di kontinuidat i aksesibilidat di kuido dor di atraé e spesialistanan deseá, loke aktualmente no ta posibel. Nan a manda e karta saliendo for di e punto di bista ku CMC tambe ta kai bou di e LNT, pero na opinion dje direktiva esaki no ta kuadra.

Durante un rueda prensa den luna di Mei na Curaçao Medical Center, organisá pa e asosashon di médikonan spesialista LVMPiLC, e lei pa plafoná salario por kita entre 30 pa 60% di nan entrada.Ta un hecho ku médikonan spesialista ta mal pagá rònt mundu, si kompará e kantidat di aña ku nan ta pèrdè nan estudio pa despues drenta den servisio di un hospital i kana e  añanan eksperensha nesesario.

Entretantu LVMPiLC, tin un direktiva nobo i tin tambe komo konsehero Albertico “Chos” Romero.  Minister Silvania a sak un foto den su despacho unda a konfirma di ta bai sinta na mesa ku e edishon “mas hóben” di spesialistanan. Pero, miéntras tin e kambio den direktiva, e spesialistanan “mas bieu” ya ta hasiendo nan trámitenan pa emigrá pa un otro pais. Unda ya nan aktual salario ta garantisá.

40: por lo ménos 40 sino mas spesialista lo bandoná Kòrsou na 2024, pa evitá introdusí un plafoná salarial na 2025.