Promesa: Global a primintí na Refineria di Kòrsou i Gobièrnu di Kòrsou pa kuminsá produkshon na di dos kuartal 2024.

ISLA— Si  bai tras di planifikashon i presentashonnan original di e kompania Global Oil Management, na final di promé kuartal 2024, produkshon di asfalt mester a kuminsá na Kòrsou. Esei te ainda no ta e kaso.

Segun e presentashonnan di Global na e.o. CRU i RdK, a inisiá ehekushon di kontrakt riba 1 di yüli 2023. Ta kuminsá ku rekonstrukshon kual ta tuma 9 luna na enkargo.  E fase di rekonstrukshon ta enserá, finalisá proseso di inspekshon di tur e fasilidatnan ku Global ta bai uza, kumpra material nesesario,ehekutá tur reparashon na e fasilidatnan utilisá i instalá ekipo nobo pa e proveé e struktura pa vaporashon (Propano i Butano). Ta kalkulá e invershonnan inisial entre 20 pa 30 mion dòler estado unidense. Ta pronostiká e produkshon kuminsá durante promé kuartal di 2024 unda ta planeá pa produsí 20 mil bari di asfalt diario. No ta konosí si Global a pone 30 mion dòler abou pa e planta.

Di otro banda, propietario mayoritario di Global Oil Management, Harry Sargeant III a konfirmá su kompromiso ku Kòrsou. Esaki a el duna di konosé den un publikashon di prensa na Estádos Unídos. E artíkulo alabes ta konfirmá ku Sargeant tin un influensha grandi na e pais, despues di a risibí un pèrmit pa importá asfalt for di Venezuela pa Estádos Unídos. E kompania multinashonal ta e úniko kompania ku a logra risibi un pèrmit similar. Esaki ta un hecho ku ta pone Sargeant haltu riba lista di influentenan den e mundu petrolero. E pèrmit di Sargeant, alabes ta habri bon posibilidat pa Kòrsou. E artíkulo publiká den e prestigioso medio, Bloomberg a keda redaktá pa Nicolle Yapur i Fabiola Zerpa. Den e entrevista Sargeant a konfirmá entrega di krudo pa su planta di asfalt na Kòrsou.

Entretantu, Global Oil ta kumprando asfalt na Venezuela, pero no pa trese Kòrsou sino pa manda dirèkt New York.  Unu di e kargamentunan di 95 mil bari a sali dirèkt for di e bahia di Amuay, Venezuela. E asfalt a keda uza pa proyektonan di infrastruktura segun Sargeant a deklará na medionan di komunikashon estado unidense. E akuerdo di Sargeant i su kompania establesé na Texas ta dirèkt ku PDVSA, Venezuela. Pa por logra esaki, Sargeant a optené un lisensia prosedente di Departamento pa Fondonan i Tesoro Nashonal numerá 44. E yegada di Global Oil Management Group mester a habri porta pa mas empleo na CRU. Esaki ta lokual un presentashon ku CRU a den kuadro di e kontrakt ku Global a señalá. A pronostiká diferente fase di empleo na CRU. Por ehèmpel durante e periodo di rekonstrukshon i drechamentu di e plantanan, ta mustrando ku CRU ta bai tin mester di 80 empleo adishonal. I despues ku finalisá e rekonstrukshon pa inisiá produkshon, ekspertonan na CRU ta pronostiká un oumento den nan personal di 265 pa 340 hende. Esaki ta un oumento di por lo ménos 30%. Te ainda esei no ta e kaso.

Segun un presentashon  di CRU (Start Up of Asphalt Train), Global a firma dos kontrakt. Unu ku Refineria di Kòrsou i tambe ku Curaçao Refinery Utilities, CRU. Esaki segun un presentashon ku CRU a hasi den kuadro di e proyekto pa produsí asfalt na Kòrsou. Den e kontrakt ku RdK, Global ta asumí tur responsabilidat di operashon i mantenshon pa 1. Unidatnan pa produsí asfalt. 2. Produkshon di utilidat. 3. Fasilidat pa importá propano i butano. 4.Operashon di  tres parke di tanki (krudo, asfalt i destiladonan petrolero).  5. Thermal Cracking (krákeo térmiko). Esaki ta pa eventual ekspanshon den futuro.  E kontrakt ta firmá pa sinku aña ku posibilidat di ekstenshon di binti aña.

Foto Global