Willemstad – Promé Minister sr. Gilmar Pisas a risibí Gobernador di Falcon Venezuela sr. Victor Clark dia 4 di òktober 2023.

E delegashon di sr. Victor Clark tabata konsistí di sr. Sergio Quintero (sekretario di ekonomia), sr. Yves Marcano (sekretario di Turísmo), sr. Erick Uzcátegui (presidente di e outoridat di Haf) i sra. Jessica Perozo.

E Kònsul General di Venezuela na Kòrsou sra. Marisol Guttierez de Almeida a akompañá  e delegashon.

Durante di e bishita a elaborá riba diferente tema di interes komun entre Falcon i Kòrsou.

Temanan manera entre otro aporte mutuo den ekonomia di otro, e flujo di Venezolanonan ku ta bini Kòrsou iregular, visa, promoshon turístiko di Kòrsou na Falcon awor ku frontera ta habrí, krea posibilidat i aktividatnan pa ku e sektor di agrikultura i peska, i tambe posibilidat di un Fèri entre Falcon i Kòrsou.

Durante di sr. Clark su estadia na Kòrsou e la hasi uso di e oportunidat pa hiba kombersashonnan ku diferente instansia aki na Kòrsou, manera entre otro e Ministerio di Ekonomia, CINEX, CTB, Curinde, Duana, Havenmeester, Kámara di Komersio,  VBC i Parlamento.

E la duna di konosé ku e ta hopi satisfecho ku tur e kombersashonnan ku e la hiba ku e diferente instansianan aki.

Tambe sr. Clark a duna di konosé ku nan ta sumamente kontentu ku e proseso ku ta hibando despues ku frontera a habri i tambe ku e servisio ku nan ta risibí di parti outoridat i profeshonalnan di Gobièrnu di Kòrsou.

Promé Minister sr. Pisas a ekspresá ku di parti di Gobièrnu di Kòrsou nos ke sigui mantené un bon laso ku nos bisiña Venezuela.

Na final di e bishita tabatin enterkambio di regalo di parti ambos pais.