Penstraat 30: preis di hür falsifiká den dokumentashon alto hefe Warda Kosta.

Nieuwe Haven—Un proseso disiplinario ku a tuma hopi tempu, a stroba Ministerio Públiko di prosesá un kaso penal kontra di un alto hefe na Warda Kosta.  Esaki ta lokual hefe di komunikashon na Ministerio Públiko, Roderick Gouverneur a informá mediante un mail.

E kaso ku mester a bini dilanti siman pasá, pa di dos biaha a keda posponé pa motibu ku e alto hefe ta spoorlos i bandoná Kòrsou pa Hulanda. Un intento pa logra lokalis’é na su adrès lokal, Penstraat 30, no a logra. Fiskal di Ministerio Públiko, mr. Tiggelaar tambe a informá prensa lokal ku lo entrega e kaso na Hulanda pa sigui pèrsigui e eks hefe ku a traha na Kòrsou. William vd G., a bandoná Kòrsou pa Hulanda lagando atras un persekushon penal na Ministerio Públiko. Defensa Nashonal a entrega un keho riba e alto funshonario, pero Ministerio Públiko no a logra yega korte na tempu. William G., a baha bai Hulanda.

Tabata Defensa Hulandes mes a hasi keho kontra di e alto hefe na Warda Kosta. Ministerio Públiko ta sospechá ku William vd G., a falsifiká su akuerdo di hür riba un kas na Penstraat 30. E alto hefe, a falsifiká e akuerdo, dor di oumentá e preis di hür ku e propósito, pa risibi mas tantu kompensashon serka Defensa.