A usa e kalkulashon akí pa yega na e sumanan di salario máksimo.

WILLEMSTAD – E promé fase pa introdukshon di lei yamá Landsverordening normering topinkomens (LNT) a kuminsá. Entretantu gobièrnu a entregá e di 5 i último kambio den e proyekto di lei akí, pa maksimalisá salarionan di funshonarionan altu den entidatnan di gobièrnu.

Awor Parlamento mester trata e lei akí. Si aprob’é, tur entidat grandi por paga maksimalmente 295 mil florin i esnan chikí por paga un máksimo di 227 mil florin na funshonarionan altu pa aña. Gobièrnu por desviá fo’i e norma akí pa medio di un Lbham, esta un dekreto nashonal ku ta kontené medidanan general, pero no mas ku 130% dje salario máksimo.

Esaki ta nifiká ku si e funshonario ta bin na remarke pa kobra 295 mil florin i gobièrnu ke desviá i pagué mas tantu, por surpasá e suma aki te na kasi 679 mil florin pa un aña kalendario. I pa un entidat chikí e máksimo lo por oumentá te na 522 mil florin. Introdukshon di e lei ta un dje kondishonnan ku Hulanda a pone pa por kuminsá drai bèk e desishon di a kòrta den e kondishonnan laboral di ámtenarnan i esnan di mesun rango ku 12,5%, i di e Ministernan i Parlamentarionan ku 25%.

E punto di salida pa yega na e salario máksimo ta e salario di e Promé Minister di pais. Porlotantu ta yama e lei aki tambe e ‘minister-presidentnorm’. Anteriormente Minister Javier Silvania di Finansa a referí na e norma akí komo e Pisasnorm, pues un lei ku ta hiba e nòmber di Minister-Presidente Gilmar Pisas. E lei akí ta similar na esun ku tin na vigor na Hulanda ku a haña e nòmber Balkenendenorm. E lei ta hiba e nòmber di Jan Peter Balkenende ku tabata Minister-Presidente di Hulanda durante e periodo di 2002 i 2010. Na Hulanda i na Kòrsou e salario di niun hende por ta mas ku 130% mas altu ku e salario dje Minister-Presidente.

E Minister korespondiente huntu ku Konseho di Ministernan por disidí di nombra un funshonario altu pa medio di un lbham i disidí ku e sí mester kobra mas tantu ku e salarionan máksimo stipulá. E lei ta duna posibilidat pa esaki. Pero gobièrnu mester sòru pa e salario no surpasá 130% dje salario máksimo manera stipulá den e Pisasnorm. I promé ku tuma e desishon akí, mester kumpli ku loke e Dekreto di Kódigo di Bon Gobernashon ta bisa. Konforme artíkulo 4.3 dje dekreto akí mester skucha un entidat instalá pa medio di un dekreto, enkargá ku duna gobièrnu konseho tokante salarionan di komisarionan i miembronan di direktiva di un entidat.

E entidat akí mester duna konseho na e Reunion General di Akshonistanan pa loke ta trata e maneho di salario i tokante e salario di miembronan individual ku Hunta di Komisario lo determiná. Den e konseho mester atendé: e struktura di salario; e nivel di e komponentenan fiho i variabel dje salario; e derechonan di penshun, di retiro i otro benefisionan; i e kriterionan di prestashon i e aplikashon di esaki. Gobièrnu ta obligá di publiká e desishon tambe den Landscourant pa pueblo sa ken ta bai kobra mas tantu.

Pa stipulá e norma den e LNT, a tene kuenta ku e sumanan adaptá dje Minister-Presidente, ku ta e sumanan despues dje redukshon a base dje prinsipio di solidaridat entrante 1 di yüli 2020. E salario máksimo di e Minister-Presidente di Kòrsou ta kai den skal 18, trapi 9 for di 2010, ku ta 14.563 florin. Alabes e proyekto di lei ke kambia e suma di retiro (ontslagvergoeding) i stipulá esaki na maksimalmente 99 mil florin pa funshonarionan altu di un entidat grandi, i 76 mil florin pa esnan di un entidat chikí. E suma di 99 mil florin ta un tersera parti dje salario máksimo di 295 mil florin, i e suma di 76 mil florin ta un tersera parti dje salario máksimo di 227 mil florin. Awor Parlamento mester trata e proyekto di lei. E espektativa ta ku lo hasié promé ku aña bòltu. No tin un fecha ainda pa tratamentu den Parlamento.