WILLEMSTAD,– Riba djasabra den oranan di atardi PSB Bank a tene nan evento Outo, Kas + Mas. Mirando e kantidat di bishitante ku a presentá por konkluí ku evento tabata sumamente eksitoso.

Durante un rekorido “Live” den oranan di mainta, por a nota ku e tim di PSB Bank tabata moviendo duru pa asina kaba ku tur e preparashon nan di e evento Outo, Kas + Mas. Ta asina ku Latifah Cijntje di PSB Bank a indiká ku den pasado nan a organisá vários evento ku éksito i pa e biaha aki si nan a opta pa bai “All Out” riba e parkeerplaats di Goisco. Sinembargo ku un entrada grátis kombiná ku charlanan interesante, por a ferwagt ku e evento aki lo ta eksitoso.

Den e sala di presentashon PSB Bank a organisá 4 charla ku diferente tópiko. Ta asina 5 or di atardi direktornan di PSB Bank, Rochelle Monti i Elvis Thodé a habri e atardi ku e tópiko “Ban papia finansas”. E enfásis durante e charla aki tabata e aspekto i importansha di un finasas personal sano.

Despues di e promé tópiko di finasas, Angelique Victoria tabata tin e tópiko “ban papia hipotek”. E notario ku ta traha na ofisina di notario Kleinmoedig & Naaldijk splika e diferente kondishon nan na momentu ku tuma un hipotek.

7 or di anochi Robert Salas a duna splikashon tokante e balor di bo kas. Kiko ta afektá e balor riba un forma positivo i kiko por afekt’é riba un forma negativo. Tambe Salas a splika diferente aspekto tokante kon pa balorá bo kas.

E último charla di e anochi a keda presentá dor di Sherelle Nulkes. E propetario di Okes a papia tokante e importansha di diseño den bo própio kas.  

E evento eksitoso a sa di tin kompanianan di outo manera, Universal Motors, Select Automotives, Dabboussi Motors, Star Motors, Dynaf, Crown Automotives, Autocity i Ultimate Automobiles. Mas aleu PSB Bank a opta pa invitá e timnan di Wechi, Okes, Goisco i Aska pa asina presentá diferente aspekto di bibienda.

Por último PSB Bank a brinda e posibilidat ku durante Outo, Kas + Mas, tur persona por apliká mesora pa un fiansa ku kondishon nan faborale. Tambe tabata tin interesnan spesial ku tabata bálido solamente durante e evento.