Ramon Chong.

Nieuwe Haven—Eks presidente di Partido Nashonal di Pueblo, Ramon Chong ke bira minister. Esei ta lokual a bini dilanti djamars último durante un tratamentu sivil entamá pa Chong. E proseso entamá tabata kontra di eks formadó Chester Peterson i Promé Minister Pik Pisas.

Ta trata di un proseso andando for di Yüli 2021 den kortenan, despues ku Chong a entamá un proseso pa deklarashon di derechi.  For di Yüli 2021,tantu Promé Minister Pik Pisas i eks formadó di su kabinete Chester Peterson tabata testigu durante tratamentu di e proseso pa deklarashon di derechi entamá pa Ramon Chong. Chong mediante su abogado Michael Bonapart a inisiá e  proseso sivil na 2021. E tratamentunan preliminar ta den proseso i kla pa tratamentu den korte dilanti un hues. Debí ku e proseso pa deklarashon di derechi ta basa riba prinsipionan hurídiko profundo un wisio sumario no tabata al kaso, fòrsando e proseso pa pasa a fondo. E kompleksidat i interkambio den diferente kódigo i legislashon ta obligá e demandante, den e kaso aki Chong pa duna un splikashon amplio na korte. Chong, ta bai buska un desishon di korte riba un ekspreshon di su derechinan i basa di esei e por sigui skohe su pasio. 

Durante un deklarashon di derechi, e demandante ta súplika korte duna un ekspreshon kon “lei ta interpretá su situashon”. Pues kontrali na spekulashonnan, Ramon Chong na 2021 no a bai korte pa eksihí un nombramentu komo minister di Asuntunan Ekonómiko. Chong a enkaminá su proseso atraves di diferente legislashon. Ta trata di artíkulonan 10 insiso 3, artíkulo 17 i 25 di e Tratado Internashonal pa Derechinan Polítiko i Sivil. Tambe a uza artíkulo 8 pa Protekshon I Derechinan Humano,  artíkulonan 5 i 12 di Estado di Derechi di Kòrsou huntu ku artíkulo 8 Dekreto pa Dokumentashon Hudisial.  I naturalmente e Legislashon riba Skrining di Kandidato.

Djamars último Korte Sivil a trata e prome kaso den su kontenido, unda Chong klaramente ke mantené su posibilidat di bira minister. Pero korte den e kaso di Chong ta riba eis fini, pasobra poder di korte no por entremeté ku e poder polítiko (legislativo), esta Korte no por imponé un desishon pa formadó òf prome minister nombra Chong komo minister. Chong tabata den e proseso pa keda proponé komo minister di Asuntunan Ekonómiko na 2021, pero formadó Chester Peteron no tabata por a presentá Chong despues ku Prokurador General a duna un konseho negativo. Ademas segun Peterson den Korte, miembronan den koalishon no tabata kier a mira Chong komo minister tampoko.

Ramon Chong na 2021, tabata unu di e motornan pa restrukturá i popularisá Partido Nashonal di Pueblo. Konsekuentemente e partido a logra 3 asiento den elekshon, pero Chong no tabata riba lista. E partido a duna formadó Chester Peterson e enkargo pa averiguá si Chong tabata por a bira minister. Na e momentonan ei e tabata presidente di Partido Nashonal pero despues a baha komo presidente. Prokurador General a bai averiguá den filenan na Hulanda unda Chong ainda tabata registrá komo persona ku antesedente kriminal. Na 2003, Chong a keda kondena na kastigu di prizon pa un kaso di soborno.

Durante tratamentu djamars último, hues a kuminsá puntra si tin puesto vakante komo minister den aktual kabinèt di Pisas II. Abogadonan a splika hues Otto Nijhuis ku tin un puesto vakante kual ta Minister di Salubridat Públiko i ku minister interino riba e puesto ta aktual minister di finansas, Javier Silvania. Pero tambe a splika hues ku e kartera liber ta unu asigna na Partido MFK. Segun Chester Peterson, niun persona kende tin un karchi di kastigu no por bira minister ni maske kiko e hasi, pues e trayekto di Chong pa buska un puesto ministerial ta imposibel. 19 di febrüari korte ta tuma un desishon riba e kaso.