Korte: Ramon Chong huntu ku su abogadonan Michael Bonapart i Sue Ellen Gonzales.

Nieuwe Haven—Eks presidente di Partido Nashonal di Pueblo, Ramon Chong, ayera den korte a entrega por lo ménos 5 demanda pa súplika korte un desishon riba su rechaso komo kandidato minister. Segun Chong, Prokurador General a atmití di  aktua robes i ofresé un diskulpa, lokual ta motibu sufisiente p’e akudí na korte sivil.

Chong mediante su abogadonan Bonapart i Gonzales a splika korte ayera ku e investigashon di Prokurador General riba su antesendentenan kriminal no a kuadra ku lei i mester kaduká. Chong ke pa inisiá un investigashon nobo mediante Promé Minister Pik Pisas, pasobra Chester Peterson komo eks formadó no tin un outorisashon ei mas. Chong ta bisa ku e petishon pa un investigashon nobo mester keda akordá via di e kabinete di Minister Presidènt.

E diskushonnan den korte un biaha mas a mustra e nesesidat pa un korte konstitushonal. Tabata trata di diskushonnan bastante kompliká i tékniko. Ta asina bo tin un registro di antesedente penal (strafblad register) kual ta registrá historia deliktivo di un persona i un sistema di karchi di kastigu (strafkaarten systeem). Den e registro di antesedente penal ta bai tur órden di hues manera verediktonan. Ta trata di un registro riba antesedente penal unda tin e desishonnan tumá pa korte penal. Den e sistema di karchi di kastigu, tin e rapòrtnan di polis, multanan polisial ets. Ta trata di dos registrashon diferente, pero sumamente importante den kaso di Chong i su proseso di nombramentu.

Na momento un persona risibi un kastigu di hues penal bo ta drenta den e registro di historia deliktivo (strafregister). Pa Chong esaki ta relevante pa su kandidatura. E dekreto nashonal riba integridat di minister ta splika ku na momento mester hasi un investigashon pa presentashon di kandidatura pa minister mester konsulta e registro di antesedente deliktivo (strafregister) pero tambe e registro karchi di kastigu (strafkaart). Despues di e sondeo den ámbos registro, mester mèldu resultado di nan investigashon, miéntras esakinan ta presente.

Esaki ta nifiká, si un kandidato a risibi un kastigu penal den pasado bo ta drenta den e registro di antesedente kriminal i konforme lei, mester tin un veredikto pero e veredikto despues di un temporada ta sali for di e registro di antesedente kriminal (strafblad register). Esei ta nifiká ku e veredikto no ta keda permanente den e registro di antesedente kriminal. Esaki netamente ta e diskushon den e kaso di nombramentu di Ramon Chong.  Awor, den e registro di karchi kastigu (strafkaarten systeem) ta un otro kestion pasobra den e registro aki tin prosedernan penal den pasado di un persona manera prosès ferbal, pero e tèrmino di kadukashon ta kore otro i ta mas largu.

Defensa di Chong ayera a duda den e proseder di Prokurador General na momento e la suministrá eks formadó Chester Peterson ku informashon riba Ramon Chong. Abogadonan a kuestioná e investigashon di Prokurador General, kende a duna Chong un diskulpa pa su proseder inkorekto. Lokual a bini na kla ayera, ku e Prokurador General na Kòrsou no a buska su informashon riba Chong den registronan na Kòrsou sino na Hulanda. Esei e la atmití tambe den dos korespondensha ku Chong unda na prome instante e la menshoná di tabata un fayo i despues a bisa ta un omishon di su parti.

I netamente riba esaki, Ramon Chong a demanda un proseder nobo di evaluashon di su kandidatura komo minister. Segun abogadonan di Ramon Chong, Michael Bonapart i Sue Ellen Gonzales, si Prokurador General a bai Hulanda pa buska informashon riba antesedente di Chong, e la aktua pafó di teritorio ku ta kubri e dekreto pa integridat ministerial. Pasobra e punto ta bira ku den e registro di karchi di kastigu tambe tin resúmen di e.o. tambe verediktonan i prosès ferbal i ta trata di anotashon i no e verediktonan riba su mes, manera den kaso den e registro di antesedente deliktivo (strafbladregistratie). Via di anotashon, en bèrdat por haña e informashon ku tabatin un veredikto penal, den e kaso aki di Chong, kual a kaduká den e registro di antesedente deliktivo (strafbladregister).

Den kaso di Eduard Braam por ehèmpel, hues Christiaan ta konkluí ku e registrashon karchi di kastigu ta kaduká te na momento bo yega 80 ana òf momento bo fayesé, pero tambe ta rasonabel pa tene e registrashon asina largu den e sistema di registrashon karchi di kastigu. Den kaso di Chong,  prokurador general a mèldu di a haña un “informashon” di Ramon Chong den e registro di karchi kastigu. E abogadonan e ora ei a referí na artíkulo 7 insiso 1 ta splika ku e formadó mester evaluá e informashon na su balorisashon den kuadro di nombramentu abase di e informashon ku e la risibi di prokurador general prosedente for di e registro di karchi kastigu. I si ta trata di un informashon di 20 ana pasá, (Chong a keda kondena na 2003), segun e abogadonan, e formadó mester a evaluá si e informashon tabata relevante pa keda sin presentá Ramon Chong komo kandidato minister. Pues Prokurador General den su tarea komo suministradó di informashon, no a duna informashon balorá i tambe a subi pafó di su teritorio di sondeo. Den kaso di Chong, formadó Chester Peterson e temporada ei a evaluá e informashon marginal. Pues, Peterson a bai tras di lokual Prokurador General a dun’é na informashon.

Abogadonan di Chong tin un karta di Prokurador General unda e ta bisa ku segun su opinion, e formadó a hasi bon di no presentá Chong su kandidatura. Esei ta nifiká ku e Prokurador General a duna un balor na e informashon i no duna e informashon riba su mes (stand alone). Esaki segun abogadonan di Chong no tabata korekto.