Saka: via e tènker Seasonator a logra saka e fuel oil kontrabanda karga hiba teritorio estado unidense na St. Croix.

BULLENBAAI—Refineria di Kòrsou i CRU, manera ampliamente publiká a logra saka e fuel oil den tankinan na Bullenbaai i risibi 10 mion dòler estado unidense na hür atrasá. E kompania Grey Rock Gathering and Marketing mediante nan abogado Phelps Dunbar a depositá e sèn riba kuentanan di RdK na Wells Fargo, estado unidense.

Entretantu e produkto a yega St. Croix na Islas Virgenes despues ku e tènker Seasonator a bai ku e fuel oil. Pa Kòrsou e benta di e fuel oil tabata un alivio debí na e atenshon internashonal ku tabatin riba e produkto. Kontrali na lokual, Gobièrnu di Kòrsou a informá parlamento na 2023, e produkto no tabatin lisensia i dokumentashon di OFAC pa drenta Kòrsou. Tabata trata di un produkto kontrabanda ku e kompania panameño, United Petroleo Corporation a logra saka for di Venezuela.

United Petroleo Corporation (UPC), propietario di e fuel oil den tankinan di Bullenbaai, tabata involukrá den un robo i desfalko kontra di PDVSA balorá na 435 mion dòler, kasi 800 mion florin. United Petroleo Corporation tabata e kompania ku via, Knob Trading,  Curaçao Refinery Utilities, Refineria di Kòrsou, KNOB Trading a logra saka fuel oil kontrabanda for di Venezuela i pone den tankinan na Bullenbaai.  Segun prensa venezolano, tras di e kompania UPC tabatin un teniente kolonèl a saka mas ku 500 mion bari di krudo for di PSVSA pa distribuí klandestinamente. UPC entretantu a debe PDVSA di Venezuela 800 mion florin (mas ku 400 mion dòler) lokual a kondusí na bankarota di e kompania  na Novèmber 2022. Dos luna promé na Sèptèmber 2022, UPC huntu ku RdK i demas kompanianan den e struktura a logra trese fuel oil ilegal for di Venezuela pa Kòrsou. Esaki sin e lisensianan nesesario.

Pa por a logra saka e fuel oil for di Venezuela,  tabatin diferente Kolonèl i Kolonèl Teniente involukrá ku United Petroleo Corporation i na Aprel 2023, detenshonnan a kuminsá kai na momento a arestá Antonio Perez riba 18 di Aprel di e aña aki. Tambe a keda arestá den e kaso Roger Ramirez Dorante Teniente Kolonel di e Akademia Militar Estatal di Venezuela. Promé di a laga e kompania bati bankarota, a resultá ku miembronan den kuerpo militar ku rango haltu na Venezuela a uza e kompania pa saka krudo i derivadonan di krudo, na un manera klandestino for di Venezuela pa kometé desfalko kontra di e kompania. Unu di e kargamentunan, ku a partisipá na e entreganan di kontrabanda ta esun ku Refineria di Kòrsou i CRU di Kòrsou a partisipá na dje.

Na Kòrsou, promé ku United Petroleo a bai bankarota, a bin problema entre sosionan ku a trese e fuel oil Kòrsou. Na Yüni kasonan sivilnan a inisiá na Nieuwe Haven. Den e tratamentunan sivil, a keda konstatá ku niun partido no tabata propietario di e fuel oil. Esaki a nifiká ku Refineria di Kòrsou i CRU a partisipá na entrega kontrabanda dor di tuma fuel oil hòrtá na Venezuela i hinka den Bullenbaai. For di e struktura por konkluí ku e kompania UPC, registrá na Panamá a traha ku kompanianan di Kòrsou pa saka krudo for di Venezuela den un struktura di debe. UPC a risibi e kargamentu di fuel oil, komo pago di un debe supuestamente. UPC ta un kompania di Panamá i tabata doño di e kargamentu den tankinan na Bullenbaai. Pero, pa UPC por a logra pone e fuel oil den tankinan na Bullenbaai, nan a uza e kompanianan CRU di Kòrsou, Caribbean Petroleum di Kòrsou i un kompania mas, Knob Trading SA, KTSA. Despues di 1 aña a bin resultá ku e krudo ku UPC a risibi tabata propiedat di Venezuela/PDVSA i no tabatin un kambio den propiedat na momento a transferí e kargamentu for di teritorio venezolano.

Pa por a logra saka e fuel oil for di Venezuela, UPC a splika ku tabata un kompensashon di debe. Segun e lista di kargamentu di e tènker Colon ku a entrega e fuel oil na Kòrsou, tabata trata di 496 mil bari di (di 42 galòn) Fuel Oil, konsigna pa PDVSA S.A.., ku a drenta Kòrsou i tabata den tankinan na Bullenbaai. Na momento bankonan lokal a sospecha e kontrabanda, nan a blokia tur transakshon relashoná ku e fuel oil pagonan di hür pa Bullenbaai. En total tabatin, por lo ménos 11 luna atras. Ku e benta di 10 mion dòler, CRU a risibi e pago di hür atrasá i logra saka e doló di kabes for di Bullenbaai.  RdK nunka a logra presentá e dokumentashonnan ofisial di OFAC pa e kargamentu spesífiko di 490 mil bari di Fuel Oil.